Ant a bastai deximila firmas, ma intru de chini at aprontau ant essi giumpadas de meda sa lacana de su Statutu Sardu po is propostas de initziativa popolaris. Contai sa lei de Pratobello a sa parti prus manna possibili est s’obietivu: fairi connosciri a totu is territorius non feti de s’erriscu de s’ammanniamentu de is palas eolicas e pannellus fotovolcaicus, ma finas, e prus che a totu, su solu caminu chi sa Regioni Sardigna podit sighiri po fairi a manera chi non sussedat. S’indicu de s’articulu tres, litara F de su Statutu sardu, fueddat craru e tundu: nemus podit giumpai is cumandus de sa Sardigna in s’edilitzia e in s’urbanistica. Totu custu at essi spiegau a sa genti in is mesigeddas aprontadas in is biddas de s’Isula finas a su 30 de cabidanni chi at a lompiri. Dus mesis, duncas, po lompiri, sonumancu, a cincuantamila firmas.
S’arregorta at essi in totue, gratzias massimamenti a su trabbaglu de is sotzius contras de sa speculatzioni energetica. Is sotzius chi s’agatant in peis funt in totu dixiotu, duncas si podit trabbagliai beni in dogna logu de sa Sardigna. Ant essi custus, cun s’agiudu de is sindigus e de is consiglieris comunalis a aprontai craramenti s’arregorta. De fundamentu mannu at essi finas s’agiudu de s’Anci, difatis custa proposta at una de is chistionis in s’Atobiu de su 31 de mesi de orgiolas in Abbasanta.
Candu ant essi giumpadas is firmas sa lei de Pratobello at essi amostada in Consigliu Regionali, a innantis in is cumissionis, aunia at essi bista beni, e a pustis in s’Aposentu mannu de totu is consiglieris.
In su fratempus, de calecuna dì, su progetu de dixiotu est stetiu presentai po fraigai unu parcu “agrivoltaico” in su Guspinesu. S’at a lamai “Guspini” e at a tenni una potentzia de 42,619 MWp. Immoi at essi s’Assessori a is trabbaglius publicus a studiai su progetu.
Màuru Mura
Lunis, su bintinoi de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.videolina.it/articolo/tg/2024/07/27/orgosolo_ecco_la_legge_pratobello_24_contro_la_speculazione_energ-78-1202738.html
