Sabudu e dominigu si votaiat po torrai a fairi su Parlamentu europeu in bintunu natzionis e in Italia at bintu chena de farta peruna su partidu de Fradis de s’Italia, chi sighit a si ndi pesai finas cunfroma a is numurus de is politigas de su mesi de cabudanni de su 2022. Beni meda finas su Partidu Democratigu de sa segretaria Elly Schlein, delusioni manna invecias po is steddaus chi non lompint mancu a su 10%. In sa cuntierra de su centrudrestra, po biri chini est prus forti intru de Fortza Italia e sa Lega, bincit su partidu pesau de Berlusconi. E sa Lega chi iat puntau totu in Vannacci non si lingit de seguru is mustatzus. Bonus medas is numurus de Alleantzia Birdi e Manca, in su mentris chi is partidus de su centru comenti cussus de Renzi e Calenda abarrant foras de su Parlamentu.
Is italianus, a nai sa beridadi pagus castiendu massimamenti sa genti chi est andada a votai (feti su 49,7%) ant sceberau ancora una bia su partidu de Giorgia Meloni.
Fradis de s’Italia s’acostiat a su 29%, su Partidu Democratigu giumpat de pagu su 24% e de aici afortiat su poderi de Elly Schlein in su partidu.
A suta de dogna pensada est su numuru de votus de is Steddaus: su partidu de Giusepu Conte pigat su 9,9% e est pagu a innantis de Fortza Italia chi si frimat a su 9,7%. Sa Lega, comenti eus nau, perdit sa partida po essiri su partidu de dus de su centrudrestra e abarrat a su 9,1%. Bonus de averas is numurus de Alleantzia Birdi e Manca chi lompit a su 6,6%: est stetiu intzertau su scioberu de airi candidau a Ilaria Salis. Foras de is bancus de Bruxelles duncas Renzi e Calenda: Stadus Unius po s’Europa (chi a intru teniat Italia Viva, +Europa e atrus) si frimat a su 3,73% e Atzione a su 3,3%. Duncas non giumpant su 4% chi serbiat po imbucai.
Aici comenti non ant giumpau su 4% finas Migheli Santoro cun “Pagi, Terra, Dignidadi” (2,2%), Libertadi de Cateno De Luca (1,2), Suditiroler Volkspartei (0,5), Alternativa Popolare (0,39%), Democrazia Sovrana Popolare (0,14%), Partito Animalista-Italexit per l’Italia (0,13%), Rassemblement Valdotain (0,06%).
Màuru Mura
Lunis, su dexi de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.adnkronos.com/politica/elezioni-europee-seggi-aperti-23-orari-come-si-vota-ultime-news_3Vi3rMHXtPVlPI3jfAfCiK
