Su telefoneddu de Francisca Deidda, bocia a corpus de marteddu de su pobiddu Igor Sollai su dexi de maju de ocannu passau, non ce dd’at acabbada in mari, aici comenti non ce dd’at acabbada sa matzeta de unu chilu umperada po ndi boddiri sa picioca a conca, in su mentris chi si pasaiat in su divanu de sa domu insoru in Santu Sparau. Ndi funt cunvintus is indagadoris, non feti poita ant cumpudau totu su fundu de Santa Gilla (logu aunia Sollai at nau de airi fuliau telefunu e matzeta), ma finas poita su telefoneddu s’est torrau a alluiri, po prus o mancu set’oras, in su mesi de cabudanni, candu su bocidori chi at amitiu sa curpa sua, fut giai in presoni de dus mesis e sighiat a nai ca sa pobidda si ndi fut andada de domu po sceberu.

Su telefunu de Francisca si ndi fut smortu su trintunu de maju, est a nai candu Igor Sollai iat scipiu ca su fradi de sa picioca iat chistioanu cun is carabineris po mor ca non teniat peruna nova de sa sorri. Francisca fut sparessia su dexi de maju, iat lassau spantosamenti su trabbagliu e nemus dda iat prus intendia: dogna tanti calencunu, amigas o parentis, erriciat messagius aunia, Sollai po contu de sa pobidda, naraiat ca si ndi fut stesiada ca ndi teniat abbisongiu.

De s’acabbu de su mesi de maju su matessi telefoneddu non at donau signalis, finas a is cuatru mancu binti de mengiau de su cincu de cabudanni passau, candu Igor Sollai, a dogna contu, s’agataiat giai in su presoni de Uta, ca ddu ant acapiau su cuatru de mesi de orgiolas. Po prus o mancu set’oras, finas a is undixi de mengianu, su telefoneddu est abarrau alluru e s’est cumpartziu cun su ripetidori in prassa Santa Lughia in Assemini, chi imboddiat giai una parti de sa citadina e finas de su sartu. A pustis s’est mortu e de tandu mai prus ddu ant allutu. E finas chi is carabineris cussu telefoneddu ddu ant cicau in totu, mai ddu ant agatau.

 

 

 

 

 

Màuru Mura

 

 

 

Cenarba, su bintotu de martzu de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.corriere.it/cronache/24_luglio_08/cagliari-uccide-la-moglie-e-usa-il-suo-telefono-per-simulare-che-sia-viva-fermato-il-marito-e-accusato-di-omicidio-e-occultamento-di-cadavere-0b40914d-267c-450c-97c2-662bd1fdexlk.shtml