Visitas medicas in Roma po Giuanniluca Lapadula, s’atacanti italu-peruvianu comporau de su Casteddu po donai fortza a s’atacu casteddaiu de fatu chi Joao Pedro si nd’est andau in Turchia, a su Fenerbahce.

Su giogadori at giai lassau Benevento e iat podiri lompiri in Sardigna giai cras, po si ponni a dispositzioni de sa scuadra po is partidas cun su Strasburgo e su leeds.

Po Lapadula – chi torrat a agatai mister Liverani a pustis dus annus, ca funt paris in su Lecce – est prontu unu cuntratu de tres annus.

In su fratempus at pigau fueddu Joao: “Is primas dis innoi funt andadas beni meda. Podis essiri unu pagu bregungiosu candu lompis in d’una scuadra noa, ma de su cumentzu is cumpangius nous m’ant fatu intendiri in domu. Po unu giogadori est de importu mannu cussu de s’intendiri inderetura in domu. Cussu chi depu fairi est de mi ambientai su prima possibili”. “Connoscia su Fenerbahce – at sighiu a nai – ma non beni meda. Apu intendiu chistionai de custu logu de Alex poita est unu nomini de importu mannu po mei. Ma ant contau finas is fueddus de Bruno Alves, chi at giogau cun mei in Casteddu.

Difatis finas su difensori portoghesu, chi immoi fait su dirigenti po su Aek Atene, at giogau cun sa scuadra noa de Joao Pedro a innantis de benni in Castedddu.

De is fueddus insoru “apu tentu informatzionis medas. Soi benniu innoi tres annus a immoi po una partida non uficiali cun su Casteddu. M’est abarrau in conca s’amori de is tifosus. Custa est una de is primas cosas chi m’ant fatu scioberai custu logu. Sciu giai ca custu est su scioberu giustu po mei e sa familia mia”.

Fueddus chi narat dogna giogadori candu erribat in logu nou, eus a benni a biri comenti si nd’at andai, invecias, cussus chi at a umperai. Po immoi is tifosus de su Casteddu a su capitanu ddi depint torrai feti gratzias, poita candu si nd’at tirau sa maglia fut sempiri infusta e naraus puru ca ddus at faus gosai cun gogadas galanas meda.

 

 

Màuru Mura

 

 

 

27 de triulas de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://it.wikipedia.org/wiki/Gianluca_Lapadula