Trinatanoi cumunus a s’acabbu de su mesi de maju funt tzerriaus a fairi sindigus e consiglieris nous. Duas, Assemini e Igresias, tenint prus de cuindixi mila abitantis e iant a podiri votai duas bortas. Cincu, de is trinatanoi, funt ghiaus de unu comissariu. Sabudu passau, a mesudì, funt scadius is terminis po presentai is listas.
Sa bidda prus manna a votai est Assemini chi tenit 26.159 personis chi ddue bivint. Po s’ora a ddu ghiai ddu est unu comissariu, Brunu Carcangiu. Tres is candidaus a sa carriga de sindigu. Si torrat a amostai su sindigu beciu, Mariu Puddu, chi si nd’at tirau sa magligedda de is Steddaus. Immoi est presentau de cuatru listas: una civica chi tenit cussu nominis paris a is Riformatori, Udc e Sardigna 2020. Su centrumanca, sperimentat s’alleantzia intru de su Partidu Democratigu e is Steddaus, paris a su Psi e sa lista civica Assemini va avanti, e tenit comenti de candidau sindigu Diegu Corrias. Sa drestra currit a sa sola e puntat in pissu de niside Muscas, presentada de Fortza Italia, Fradis de Italia e Lega.
In Igresias funt doxi is simbulus presentaus. Arremonaus ca sa tzitadina de su Sulcis est bivia de 25.382 personis. Comenti in Assemini, finas in Igresias funt tres is candidaus a sa carriga de sindigu. Seti listas sustenint su sindigu in carriga Mauru Usai, cun centucorantaseti candidaus a consiglieris. Cuatru listas funt po Giusepi Pes cun norantases candidaus consiglieris. Su partidu de Giorgia Meloni, Fradis de Italia, andat a sa sola cun Luisu Biggio e binticuatru consiglieris candidaus.
Is atras biddas chi ant a votai funt: Tortolì, Deximu, Crabas, Collinas, Donori, Flumini, Furtei, Gesturi, Senorbì, Seui, Teulada, Crabonaxa, Villaspeciosa, Garteddì, Irgoli, Meana, Oliena, Sindia, Abas, Boroneddu, Milis, Modolo, Narbolia, Nughedu Santa Vitoria, Pompu, Simala, Soddì, Bidda Birdi, Biddanoa Truschedu, Aglientu, Budoni, Cheremule, Tzaramonte, Palau e Sedini.
Màuru Mura
Mercuris, su tres de maju de su 2023
Foto: https://www.lanuovasardegna.it/italia-mondo/politica/2023/02/23/news/elezioni-amministrative-si-vota-il-14-e-il-15-maggio-1.100247551
