A pustis s’abba pagu est lompiu su grandini. E po mori de una e de s’atra est meda su disacatu in su sartu. No agatant pagi is massaius de is zonas de mesania e de sus de sa Sardigna. In is urtimus mesis ant depiu fairi is contus cun s’abba chi non ddi calaiat de su cielu mancu a fustigu e po custu s’abba, massimamenti in Baronia, no est a dogn’ora. Est de nai finas ca is digas funt unu disisperu e cun sa stagioni turistica chi est lompendu, e duncas c’at essi sempiri prus genti, at a serbiri abba de prus.
Eris sa spera, comenti si sciat, fut a proiri. Invecias funt lompius pibionis de ghiaciu.
“A pustis mesis meda chena de abba, chi at postu in genugu is massaius de sa Barbagia arta e de is Baronia, est lompiu su grandini po donai unu corpu de gratzia a una situatzioni giai posta mali”. Ddu at nau su presidenti de Confagricoltura de Nugoro e Ogliastra, Micheli Ena, arremonendu su grandini chi nd’est calau eris, intru de s’ora de prangiu e su pusti, mascamenti in sa zona de Biti, Orune, Onani e Luvula.
“De oi”, at sighiu Ena, “eus a fairi is contus chi funt prus che a totu po is bingias, is olias e is campus. Sa sola cosa chi andat beni, de custu mercuris de scaresciri, pertocat s’abba chi, is is oras benientis, at a lompiri in sa diga de Maccheronis in Torpé. un agiudu chi est una prenda po nosu e chi at a cresciri cun s’abba chi nd’at a calai po preniri sa diga. Arremonaus ca oi si ddue agatant feti otu milionis de metrus cubus de abba contras de is bintitres de ocannu passau”.
E propriu custu problema est a su centru de cuatru mesas tecnicas aprontaus intru de eris e oi de sa Egas cun is cumunus de Siniscola, Santu Tiodoru, Budoni, Torpé e Posada, chi funt cussus prus corpius de s’abba pagu.
A is atobius funt stetius cumbidaus s’Agentzia regionali Adis, Abbanoa e is sindigus de is cincu cumunus de sa Baronia e de sa Gaddura bascia.
Màuru Mura
Giobia, su bintitres de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.meteosvizzera.admin.ch/chi-siamo/meteosvizzera-blog/it/2023/06/come-si-misura-la-grandine.html
