“S’interru prus mannu possibili po un’omini de spantu de su fubalu”. Est cussu chi su Bayern Monaco bolit aprontai in s’Allianz Arena po Franz Beckenbauer, astru mannu de su fubalu de su Bayern e de sa Germania, mortu eriseru a s’idadi de setantot’annus a punstis airi cumbatiu, de una pagu de tempus, cun sa pesta de su Parkinson e airi tentu prus de un’operatzioni a su coru. In is oras chi ant a benni s’ant a atobiai, chini de doveri, po cumentzai a aprontai, ma po cussu chi si scit su presidenti beciu de su Bayern Karl-Heinz Rummenigge iat airi giai fueddau de sa chistioni cun su presidenti onorariu Uli Hoeness. Rummenigge etotu, chistionendu cun sa Bild at nau ca “Su Bayern iat depiri aprontai una cerimonia de arregodu po Beckenbauere in su stadiu chi chena de issu no si podiat agatai”. “S’interru prus mannu de dogna tempus”, po unu giogadori chi, po Rummenigge, “at torrau a scriri sa storia de su fubalu tedescu e ddu at lassau unu sinnu comenti de nemus atru”. “Fut su capitanu miu in su Bayern, s’allenadori miu in sa scuadra natzionali, su presidenti nostu in su Bayern, e in totu custus logus non feti at tent usucessu, ma est stetiu unicu”. “Comenti de omini spantaiat s’arrespetu chi teniat po totus, poita a is ogus de Franz totus funt ogualis. Su fubalu tedescu perdit s’omini prus mannu de sa storia. Nos ata amancai cun dolu mannu. Ti torraus gratzias de totu cussu chi as fatu, Franz stimau”.
Beckenbauer at giogau prus de cuatruxentus partidas cun is coloris de su Bayern; at bintu cuatru scudetus e tres cupas de is campionis in Baviera, a innantis de binciri sa Cupa de su Mundu de giogadori in su 1974 e de allenadori in su 1990.
In vida sua at tentu cincu figlius, finas chi su prus mannu est mortu in su 2015 po mori de unu cancuru a su ciorbeddu. Beckenbauer lassat sa podidda Heidi e is atrus cuatru figlius.
Màuru Mura
Martis, su noi de gennargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ilpost.it/2024/01/09/franz-beckenbauer/
