Postus de trabbagliu nous, e custa est de seguru una bella nova po su mundu de sa scola, S’atra faci de sa medaglia, narant is sindacaus, est ca su numuru de is trabbagliadoris nous est meda prus basciu de cussu chi s’abbisongiat e finas po su “sostegnu” non benit donada s’atentzioni chi minescit.

Su ministru de s’Istrutzioni e de su Miniscimentu Giusepu Valditara at firmau sa lei po is assuntzionis de is professoris in is scolas statalis de “dogna orini e gradu” po s’annu scolasticu de ocannu chi benit, 2025/2026. In totu ant essi 48.504 postus de trabbagliu nous, de is calis 13.860 po su “sostegnu”. Cun dd’un’atru decretu ant essi postus in regula is 6.022 postus po is professoris de religioni, pigaus de is listas de su cuncursu fatu in su 2024. Is urtimas novas in custu mundu funt de su 2004, narat su ministru: “Po Cabudanni ant essi prus de cincuantacuatru mila is professoris nous. Unu numuru spantosu chi non si fut mai amostau”.

“Po immoi teneus feti datus de massima, in Sardigna is postus nous iant depit essiri in totu, prus o mancu, milli e centu”, spiegat Emanuela Valurta, segretaria regionali Flc Cgil. “A dogna manera, finas de nosu, comenti in totu s’orrestu de s’Italia, is postus nous no ant a preniri totu cussu chi abbisongiat. E a s’acabbu, eus a tenni genti chi podit trabbagliai chi no at agatai postu e duncas atru precariau. E ant a sighiri a lamai suplentis in numuru artu. Insoma – avertit su sindacau – funt mesuras chi no ant a fairi beni a is discientis chi no ant a connosciri unu sighimentu didaticu e po sa scola e su trabbagliu chi non podint tenni comenti de fundamentu su precariau”. E ancora: “Abarrat su disisperu de is medissimus postus de trabbagliu, ancora chena nomini, massimamenti in su ‘sostegnu’ chi non donant coerentzia a is fueddus de su ministru”.

 

 

 

 

Màuru Mura

 

 

 

 

 

Lunis su cuindixi de triulas de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.comune.segrate.mi.it/novita/notizie/dettaglio/Scuola-dal-18-gennaio-aperte-le-iscrizioni-per-lanno-2024-2025/