Cussu chi iat lassau lunis passau cun su Napoli, su Casteddu si ddu at pigau eriseru in Torinu. Partida binta 2-1 po is sardus a pustis airi sunfriu unu pagheddu ma chena lassai, custa borta, peruna pensada. Si ddu minesciat su Casteddu e imoi s’agatat a foras de is postus chi fiant calai in Serie B. Bellanova, sempiri prus spantosu custu giogadori, in su primu tempus e Deiola, a pustis chi su Torinu iat paregiau cun Belotti, in su segundu, ant permitiu a su Casteddu de ndi torrai de su Piemonti cun tres puntus chi faint classifica giai ma finas meda allirghia. Imoi si cumentzat a biri su fubalu chi boliat Mazzarri, allenadori tra is prus mannus chi siat erribau in Casteddu. Bastaiat a tenni passientzia, comenti naraiat s’allenadori toscanu, e is puntus iant essiri lompius, ca is giogadoris de su Casteddu non funt prus pagu cosa de giogadoris de atras scuadras. Est a nai, dda eis mai ligia sa formatzioni de su Spezia? Giogadoris giovunus e fortis, ma is casteddaius tentint de seguru calencuna cosa de prus.

A essiri foras de sa zona retrocessioni fait giogai cun sa conca prus liberta e cun prus trancuillidadi, totu s’orrestu ddu fait sa gana, sa barra e sa cursa. Funt pagas is scuadras chi currint comenti su Casteddu e custu imoi est fendu sa diferentzia. Ma finas giogadoris cun is peis che Joao Pedro, Marin e Grassi funt fenduru aberu giogadas de spantu.

Mazzarri est stetiu bravu a digai decisionis fortis ma chi serbiant e massimamenti at tentu sa fortza de ponni giovuneddus chi funt fendu beni. Po non chistionai de su portieri: Cragno est fendu biri cussu chi balit.

Ma binta una si castiat a s’atra: sabudu in Casteddu calat sa Latzio de Sarri. Lompit arrabiada po sa partida perdia eris cun su Napoli a s’urtimu minutu. Ant a tenni gana de torrai a fairi puntus, ma cun custu Casteddu si podit sighiri a bisai.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.youtube.com/t/restricted_access?blocked=4