“In Sardigna galu non scieus comenti est acabbada”. Giorgia Meloni de s’Abruzzo chistionat de is eletzionis sardas de su 25 de friargiu passau e ancora non donat po scontada sa vitoria de Alisandra Todde. Ddi serbit massimamenti po ponni a un’ala is pensamentus e is arriolus po is eletzionis regionalis de s’Abruzzo de dominigu chi benit. Fueddendu in sa Camera de su Cumerciu de Teramo po sa campagna eletorali sa presidenti de su Consigliu at nau: “Sardigna? Ddu depeus ancora biri beni comenti funt acabbadas is eletzionis. Ma tengiu fidi manna po s’Abruzzo”.
Finas su capu de Fortza Italia e ministru de is Esteri Antoni Tajani, in Chieti, ponit a un’ala “su pensamentu Sardigna”: “In s’Isula funt de prus is votus chi at pigau su centrudestra de cussus chi at pigau sa coalitzioni de su Campu Largu. E, dapoi, est a nai finas ca in Abruzzo non si podit votai comenti est sussediu in Sardigna: su votu andat a su candidau presidenti e a sa coalitzioni su matessi”.
Elly Schlein, sa segretaria de su Partidu Democratigu, non dd’at mandada a nai: “Candu nosi presentaus totu paris binceus: ddu eus fatu in Sardigna e sa spera est chi sussedat su matessi finas in Abruzzo”.
In su fratempus Alisandra Todde est giai trabagliendu po fraigai sa Giunta, si bolit fairi agatai pronta po candu sa vitoria at essi uficiali. Sonumancu sa metadi ant essiri feminas, ant a contai, prus che a totu, is cumpetentzias.
In is dis benientis ant a cumentzai is atobius intru de is partidus chi, a dogna manera, s’ant a frimai po s’acabbu de sa campagna eletorali in Abruzzo, aunia cenarba at a chistionai finas Alisandra Todde etotu.
De sa truma de sa presidenti faint sciri “ca totu is fortzas politigas de sa coalitzioni ant a tenni rapresentantzia” At essi de seguru su PD a si pigai sa parti manna de totu, finas poita est su partidu chi at pigau prus votus de totus.
Màuru Mura
Mercuris, su ses de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.corriere.it/politica/24_marzo_05/abruzzo-come-si-vota-regionali-confronto-la-sardegna-a9a3bcfe-dadb-11ee-96be-d6d12839d1dd.shtml
