Sa Barbagia de Seulu in prassa
Pariat una dì de festa cussa de eris a mengianu in Seui: genti meda in su Stradoni cun bandelas, striscionis e bogis artas de mannus e piticus. Invecias aici non fut. Is seuesus, totu sa ‘idda est a nai, funt calaus in prassa po morrungiai contras de una politiga tzurpa, natzionali e regionali, chi amelessat de ndi liai s’autonomia de sa scola. Est de dexi dis chi is pipius e is piciocheddus no imbuncant in is aposentus de sa scola e is babbus, ma prus che a totu is mamas, funt totu sa dì frimus in sa prassa de sa matessi scola. E finas ddue dromint, su frius e sa ciligia non ddus frimat.
(Foto Camilla Carta)
Pariat una dì de festa, ma aici non fut. Su sindigu de Seui, Fabiu Moi, s’at pigau sa chistioni a coru e po eris a mengianu at cumbidau in dd’unu atobiu, obertu a totu sa genti chi bivit in sa Barbagia de Seulu, is sindigus de Stressili (Arrenatu Melis), Sadili (Brabara Laconi), Seulu (Erricu Murgia) e Ussassa (Franciscu “Chicco” Usai), acumpangiaus de is consiglieris comunalis. Funt lompius cun sa fascia a tres coloris e dognunu de issus at nau sa sua. Totus arriolaus po su benienti de is biddas insoru ma, massimamenti, po totu sa zona. Ca giai est morendusì a sa sola, po milli arregionis cun sceberus spantosus de chini guvernat, e de chini at guvernau, e non tenit abbisongiu de s’agiudu de sa politiga. Una politiga, torraus a nai, tzurpa chi decidit in sa matessi manera comenti po Milanu e Casteddu finas po is biddas sardas prus a sa stesiada de is citadis.
(Foto Fabrizio Mura)
Pariat una dì de festa, ma aici non fut. Giai in is biddas piticas nd’ant liau totu is servitzius chi donaiant un’atra dignidadi. Boleus chistionai de totus is logus aunia non s’agatat unu dotori? Seus torrendu agoa in totu. Immoi ndi stesiant finas is segreterias. Ma calencunu de cussus chi decidint ddu connoscit su caminu po lompiri in Nurri o in Isili? Nou, funt setzius in cadira, castiant feti numurus e segant chena pensamentus.
Pariat una dì de festa, ma aici non fut. Sa cuntierra depit essiri de dogna bidda pitica chi a is ogus de is citadinus, a dolumannu, serbit feti po is “Cortes Apertas” o po is fogoronis o po fairi pregontai: “Ma non c’è niente in questo paese, come riuscite a vivere?”, ca ddu narant in italianu, ca a chistionai in sardu nde ddis parit bregungia.
Pariat una dì de festa, ma aici non fut. In is montis spantosus e ammantiosus de Seui funt lompius finas is sindigus de Escroca (Eugeniu Lai) e de Biddanoa de Tulu (Arbertu Loddo). Funt stetius agradessius, ca chi Seui prangit is biddas insoru non podint erriri meda. Intru de is strangius chi ant chistionau a sa genti finas is candidaus, po is regionalis de su 25 de friargiu, Sarbadori Corrias de Baunei e Sirvia Melis de Tortolì.
(Foto Fabrizio Mura)
Pariat una dì de festa, ma aici non fut. Intru de chini at chistionau is consiglieris comunalis de Seui (Giampaulu Desogus, Ignatziu Marci e Stevini Gaviano), sindacalistas de sa Cgil, una rapresentati de is is mamas (Susanna Moi) e su sindigu seuesu de is annus otanta, Totoreddu Usai.
(Foto Fabrizio Mura e Giovanni Aresu)
Pariat una dì de festa, ma aici non fut. Su sindigu seuesu at finas cumbidau is candidaus po guvernadoris de sa Sardigna. Est lompiu, agradessiu de medas, feti Arrenatu Soru. Is atrus tres forsis teniant atra cosa de fairi.
(Foto Fabrizio Mura)
Màuru Mura
Giobia, su primu de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: Giovanni Aresu
