Po su Casteddu est unu paregiu chi ddi permitit de torrai a partiri, a pustis sa partida perdia in Monza, finas chi de seguru non ddu stesiat in manera crara de sa zona caglienti de sa classifica.
Claudiu Ranieri fut seguru chi sa partida atacaiat problemas mannus: “Timia su Verona, poita giogada in cussa manera cun is atacantis chi t’allonghiant sa scuadra”, narat s’allenadori romanu. Chi, in segus, spiegat poita at mudau sa scuadra, dapoi de sa parti de unu: “In sa parti de duas, cun s’imbucu de Viola, seus arrennescius a fairi cussu chi boliaus: mi dispragit po Shomurodov chi fut gioghendu beni meda, ma tenia abbisongiu de Viola in cussa positzioni, intru de is lineas, chi at pigau. Scia beni ca issus iant airi postu sa bocia a innanti, non bolia giogai aici e bolia giumpai su centrucampu insonu. Ma non ci seus arrennescius e apu preferiu a torrai a su giogu chi connosceus ponendu Viola in campu”.
Is piciocus de Ranieri movint sa classifica a innantis de is tres partidas cun Atalanta, Inter e Juventus. “Istaus beni, seus postus beni comenti de conca e de corpus. Scieus ca funt tres partidas dificilis meda, ma calencuna cosa nosi dda depeus pigai, cun is bonas o cun is malas”, sighit a nai Ranieri.
Su puntu de oi balit meda. Su Casteddu poderat su caminu, in prus che de su Verona, de is atras scuadras comenti de Frosinone, Sassuolo e Udinese chi a borta insoru ant paregiau po 1-1. “Fut dificili meda oi puru: candu non ce dda fais a binciri est meglius a non perdiri. Tocat a torrai gratzias a Scuffet chi nos at poderau in partida e mancu mali ca su gol de Lazovic, a su cumentzu de sa parti de duas fut foras de giogu. Finas nosu, a nai sa beridadi, eus erriscau de binciri sa cuntierra cun cussu tiru de Luvumbo a s’acabbu, ma creu chi, po cussu amostau in campu, unu puntu a cadunu est prus che giustu”.
Màuru Mura
Lunis, su primu de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://gianlucadimarzio.com/it/cagliari-ranieri-conferenza-stampa-udinese-news-16-febbraio-2024
