Arfredu Cospito, s’anarchicu chi est fendu su presoni a su 41 bis, chi est sa presonia prus tostada, in Tatari-Bancali est stetiu cundennau a bintitres annus de fairi a intru de sa Corti de Assise d’appello de Torinu chi at torrau a fairi is contus beni. Est de arremonai chi sa Procura generali iat pediu su presoni a totu vida.
Su contu est cussu beni connotu de sa bomba esplodia indenanti de sa scola de is allievus carabineris de Fossano, in sa provincia de Cuneo. Is militaris non furint bessius de sa caserma e finas sa segunda bomba non iat fatu perunu dannu e non iat lassau a terra nemus. Feti a is cestinus de s’aliga. Nudda de prus.
Fustis in su mesi de làmpadas de su 2006, est a nai dixiaset’annus a immoi. Is giuigis ant ritenniu ca cussu contu non minescit su presoni po sempiri, ponendu in pratiga sa regula de su “acadiu piticu”. Po Anna Beniamino, invecias, chi fut sa cumpangia de Cospito, sa cundenna est stetia de dixiaset’annus e noi meis de presoni. Sa procura nd’iat pediu bintiset’annus e unu mesi.
Infinis G.L.T, anarchicu chi est nasciu in provincia de Catania, est acabau suta processu po mori ca si pensat ca est acapiau a is Fai-Fri, s’organizatzioni terroristica de Cospito, est stetiu cundennau a un’annu de presoni. Po is indagadoris s’omini de trintacin’annus fut cussu chi scriat e a pustis portai in italianu e in segus fairi viagiai totu in internet is fueddus de s’organizatzioni e is rivendicatzionis.
Cospito a innantis de sa sententzia at chistionau nenduru: “Non s’agatat peruna prova chi nosu eus postu is bombas in Fossano. Custu est unu processu a is pensadas. Is anarchicus non bocint sa genti chena ci pensai, poita is anarchicus non funt che su Stadu”, fueddus chi at bofiu nai a innantis chi is giuigis de Torinu imbuchessint in s’aposentu de consigliu.
Màuru Mura
Martis, su bintiseti de làmpadas de su 2023
Foto: https://torino.repubblica.it/cronaca/2023/06/26/news/cospito_condanna_sentenza-405839525/
