In custu cumentzu de campionau de Serie A su Casteddu est fendu fatiga meda, ma in premius, chi pertocat ocannu passau de sa Serie B, “Manlio Scopigno e Felice Pulici, at fatu sa parti de su lioni. Sa manifestada chi premiat allenadoris, giogadoris e dirigentis si funt coloraus de orrubiu e asulu.
Claudiu Ranieri s’at pigau su premiu comenti de allenadori meglius de s’urtimu campionau, giumpenduru finas is atrus dus chi ce dd’ant fata a lompiri in Serie A, Grosso cun Gilardino: “Po sa promotzioni in Serie A”, si ligit in sa motivazioni, “aciapada a s’urtimu, a pustis una rimonta chi non pariat possibili po nemus, ma non po issu, s’omini de is miraculus. Su premiu est finas unu arreconoscimentu a una carriera spantosa chi ddu at bidu binciri in dogna natzioni aunia at trabagliau, poita Ranieri est unu simbulu de cussu chi balit de s’Italia, esempiu de classi, stili e connoscentzias”. S’allenadori de su Casteddu at torrau gratzias: “Est galanu a s’intendiri rapresentanti de s’Italia in logu strangiu. Torru gratzias a su presidenti Giulini chi m’at torrau a portai in Casteddu po sa borta de dus, comenti torru gratzias a is dirigentis e a is piciocus. Paris eus fatu una cosa manna e immoi ndi boleus fairi un’atra prus manna. At essi dificili, c’at abisongiu de totus, eus atobiau is scuadras prus fortis in su cumentzu de custu campionau. Seerbit trabagliu e conca tostada chena si frimai a is arriolus. Biu is piciocus chi trabagliant beni comenti nau sempiri a issus depint motivai a mei poita deu, in segus ddu depu fairi cun issus”.
In prus de Ranieri, s’agatat, intru de is premiaus, finas Lapadula. Su centravanti s’at pigau su premiu comenti de giogadori meglius de ocannu passau, paris a Mulattieri de su Frosinone, chi immoi giogat cun su Sassuolo. “Gratzias a is gol chi at fatu”, si ligit in sa motivatzioni, “su Casteddu est torrau in Serie A e po sa borta de dus est stetiu cussu chi at fatu prus gol in sa Serie B”.
Finas chi Lapadula non fut presenti at su matessi bofiu nai dus fueddus: “Soi cuntentu meda po custu premiu, massimamenti ca est intregau a Scopigno, unu de is mannus de su fubalu italianu e simbulu de su Casteddu. Po mei est allirghia candu su trabagliu miu mi portat a cosas de aici, ca bolit nai ca apu fatu beni”.
Mauru Mura
Mercuris s’undigi de Mesi de talamini de su 2023
Foto: https://www.legab.it/news/lapadula-e-lmvp-della-stagione-di-serie-bkt-2022-2023
