Funt 27.162 is impestaus nous de su Coronavirus mesuraus in is urtima binticuatr’oras in Italia, po cussu chi narant de su Ministeru de sa Saludi. Sa dì a innantis furint 36.042. Is mortus funt, invecias sessantadus, bintinoi de mancu de sa dì prima. Cun 194.577 tamponis molecolaris e antigenicus po su Coronavirus fatus in s’urtima dì (sa dì a innantis funtiri 263.747), sa percentuali de positividadi est calada de su su 14,5% a su 14%. Abarrant in terapia intensiva in 347, chi bolit nai ca nd’at intrau atrus seti, e in is atrus aposentus imoi funt 7.532, 118 de mancu.

Po sa prima borta de su mesi de martzu torrant a suta su milioni is impestaus a su Covid in Italia: funt 998.118, calasus de prus de duamila e cincu in s’uritma dì, sempiri po cussu chi ndi bessit de su ministeru de sa saludi. De dus annus a cust’ala imoi cussus chi si funt ammalaidaus funt 17.057.873, e is mortus bessint a 165.244. Is sanaus e is bessius de is uspidalis invecias lompint a 15.894.511, ca eriseru ndi funt bessius in 30.334.

In su mentris in Sardigna funt 732 is impestaus nous a su Covid-19 in s’urtima dì, in pissu de 2.403 tamponis fatus.

A dolumannu tocat a chistionai finas de atrus cuatru mortus: duas feminas de otantases e norantaset’annus e dus ominis de otantotu e norant’annnus chi biviant totus in sa provincia de Aristanis.

In aumentu de dus, e duncas erribaus a doxi, po cussu chi si ligit in su bulletinu regionali, is ricoveraus in sa terapia intensiva. Calat de otu, invecias su numuru de is pazientis chi s’agatant in is atrus aposentus ca imoni ndi contat 234.

S’abbasciat finas de 328 su numuru de is incungianus n domu, immoi si ndi contat 24.165.

Certu ca su vacinu at funtzionau beni castiendu custus numurus, ma chi si fut gherrau totu a un’ala forsis fut andau ancora meglius, cussu chi contat est ca a pagu a pagu ndi seus bessendu beni.

 

 

16 de maju de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

 

Foto: https://www.adnkronos.com/covid-oggi-toscana-3325-contagi-e-9-morti-bollettino-10-maggio_6ha3IIzQ3t4rM23iEmYANI