Un’ora de atobiu intru de su Presidenti de su Consigliu italianu Giorgia Meloni e su presidenti egitzianu Abdel Fattah El-sisi, a làcanas de su Vertici mondiali in pissu de su clima de sa COP27 in Sharm el Sheikh.

In s’atobiu, si ligit in d’una nota de Palatzo Chigi, s’est chistionau massimamenti de energia, fonti rinnovabili, crisi climatica e, non podiat mancai, de imigratzioni.

Ma non feti de custu poita non si podiat non fueddai de dus casus chi ant postu in crisi po tempus meda is dus stadus. Difatis calencunu, e prus puru, fueddu est stetiu spendiu po Giuliu Regeni, su ricercadori friulanu secuestrau e bociu in Il Cairo in su 2016 in circostantzias chi ancora funt totu de acrariri, e de Patrick Zaki, su studenti egitzianu de s’Universidadi de Bologna impresonau in Egitto cun acusas gravis de amelessu a sa seguresa natzionali, sovversioni, po airi difundiu novas fartzas, divulgatzioni de terrorismu e torrau in libbertadi su mesi de Idas passau, ma chi est galu aspetendu sa sententzia finali.

S’atobiu et serbiu po sa chistioni de su studenti italianu Regeni e po nosi agiudai intru de Stadus po lompiri a sa beridadi e tenni giustitzia”, at nau su portabogi uficiali de sa Presidentzia egitziana, s’ambasciadori Bassam Radi.

Su presidenti egitzianu, at aciuntu Radi, est cuntentu meda po comenti si funt ponendu is relatas intru de s’Italia cun s’Egitu e chi sa bisita de sa signora Meloni siat una manera in prus po cicai de fairi torrai a biviri is profundus acapius de sempiri tra is dus Stadus in pissu de poilitiga, economia, seguresa e curtura.

De parti italiana iat essi cosa manna e giusta andai a cicai sa beridadi massimamenti po is dus piciocus chi in Italia ant fatu moviri sotzius medas in is annus passaus. Immoi serbit sa volontadi politiga de amboduos, sa beridadi non depit essiri mai atacada po difendiri is serbidoris de su Stadu, ma serbit a chine chi siat poita non si possant arrepitiri. Parint de tenni fidi de dd’agatai, eus a benni a biri chi abarrant fueddus fuliaus a su bentu.

 

 

 

Màuru Mura

 

 

 

Martis, su 8 de Sant’Andria de su 2022

 

 

Foto: https://www.ilmessaggero.it/politica/meloni_sharm_al_sisi_cop27_clima_ultime_notizie_oggi-7037496.html