Casteddaia de nascioni, ma milanesa de bivimentu. Sa giornalista Carlotta Dessì est morta eris a feti trintacinc’annus, binta de sa maladia chi ndi fut benia a pigliu s’istadi passada. Dda prangit totu su mundu de su giornalismu, ma mascamenti Mediaset, aunia Carlotta Dessì trabagliaiat. Est stetia redatora de prus de unu programa po sa televisioni de Cologno Monzese, intru de is calis “Pomeriggio 5” e “Fuori dal Coro”. Po sa trasmissioni de Mariu Giordano, Carlotta Dessì iat fatu calencuna inchiesta e prus de una bia, Giordano etotu, nd’iat postu in is pumus artus su coragiu, sempiri nendu de ddi esseiri a su costau, paris a totu sa redatzioni, in sa cuntierra de sa picioca contras de sa maladia.

“Soi casteddaia cun fieresa”, aici comenti at sempiri nau de issa. Dessì si fut laureada in s’Universidadi La Sapienza de Roma e iat trabagliau finas in sa redatzioni de SkyTg24. S’urtima bia chi s’est fata biri in televisioni fut su mesi de idas passau, in sa trasmissioni de Giordano, a pustis chi fut bessia de su spidali: “Tocat a gherrai, non tocat a s’arrendiri. Una cosa est segura: non soi a sa sola. Non ddu soi mai stetia giai de sa di de unu chi apu scipiu de sa maladia, cuatru mesis a oi, in dd’una istadi milanesa caglienti meda. Detandu sa vida mia est mudada, non feti po mei est a nai, ca est mudada po totu sa familia mia e po su sposu miu”, iat nau tandu.

Tres cidas a oi in Intagram iat scitu custus fueddus: “Non timas, in custus dus fueddus apu cumprendiu chi s’agatat totu cussu chi pensu de sa vida mia. Ah, sa vida. Cantu dda cicas, candu tocas cun manu sa suferentzia e sa maladia. E t’intendis finas egoista. Su timiri fait tremai e su ciorbeddu currit. Ma non timas”.

Arregodus medas oi in social de parti de sa genti chi at trabagliau cun issa, amigus, ma finas chini non dda connosciat ndi chistionaiat beni meda po sa professionalidadi e sa gentilesa. Ma mascamente po su coragiu: a pustis s’urtia mia chi s’est amostada iat scritu aici in Instagram: “Sa dì de su torrai a partiri. De sa cura noa. Comenti chi essit cumentzau immoi” Fut su tres de gennargiu de ocannu.

 

 

 

 

 

Màuru Mura

 

 

Martis, su ses de friargiu de su 2024

 

 

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

Foto: https://www.milanotoday.it/cronaca/carlotta-dessi.html