Su Casteddu non serrat sa chistioni de si sarvai, antzis orruit malamenti in su Meazza de Milano e perdit sa partida contras de is orrubius nieddus de su Milan po 5-1. Po mori de custa partida is piciocus de Ranieri ant a depiri cicai is puntus chi serbint po si sarvai in is urtimas duas partidas contras de Sassuolo, foras de domu, e sa Fiorentina in s’Unipol Arena.
“Cincu gol mi parint tropus, ma ddus ant fatus duncas bravus meda issus”, is fueddus de Claudiu Ranieri a pustis sa pardida. “In sa parti de unu seus stetius bregungiosus meda, depiaus essiri prus barrosus e cicai de fairi gol. In sa parti de dus est andada meglius e candu fustis 3-1 ndi eus boddiu dus palus e su portieri insoru at fatu paradas bellas”. Immoi su Casteddu depit torrai a partiri, sciendu de depiri sunfriri finas a s’urtima partida: “Oi fut su ‘jolly’ de unu. Seus lompius finas a innoi cun sa pensada de fairi una bella partida, po calencunu tretu dda eus fata. In segus, candu fustis atachendu su Milan est stetiu bravu a nd’aprofitai, fendu moviri sa bocia in velocidadi”.
Su Casteddu oi agataiat unu Milan morrungiau de is matessis tifosus e chi non binciat una partida de prus de unu mesi, ma cus su segundu postu giai seguru. Ma at perdiu su matessi po 5-1 et est a nai puru ca su Casteddu non bincit in Milano de su primu de làmpadas de su 1997, de tandu feti dus puntus pinnigaus contras a is atras partidas totu perdias.
“No apu nau nudda de mali a is picious, feti ca seus stetius bregungiosus meda. Eus tentu un’ocasioni cu nLuvumbo chi at donau a palas tropu a Shomudorov ca chi nde chi no si fut agatau indenanti de su portieri a sa sola. Depit ancora cresciri, ma est unu bravu giogadori”.
Ranieri tenit ancora dudas po is puntus chi ant a serbiri po si sarvai: “Dipendit de cosas medas. Immoi depeus pensai a sa partida de importu mannu cun su Sassuolo e dapoi a cussa cun sa Fiorentina. Sa spera e sa fidi funt mannas”.
Màuru Mura
Sabudu, s’undixi de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=ADA3ULt1gsE
