A pustis Lys Assia e Celine Dion, su microfunu de cristallu torrat in Svitzera: Nemo cun sa cantzoni sua, The Code, bincit s’Eurovision Song Contest 2024. Segunda sa favoria Croatzia cun Baby Lasagna e sa de tres s’Ucraina cun is dus Alyona Alyona e Jerry Heil. Dapoi Francia, Israele, Irlanda.
S’italiana Angelina Mango, sa de cuatru po sa giuria cun 164 puntus, cun atrus 104 de parti de su televoto est lompia sa de seti in sa classifica cun sa cantzoni sua La noia.
Binticincu funt stetias is Natzionis chi ant cuncurriu, a pustis oras pagas a innantis de sa finali c’ant stupau s’artista olandesa Joost Klein, po una denuncia presentada de una femina de sa truma de produtzioni.
Un’editzioni chi, forsis comenti mai sussediu, at tentu chistionis politigas, po sa situatzioni de disisperu in su mundu. Sa guerra in s’Orienti de mesu est lompia a intru e a foras de sa Malmo Arena. Eden Golan, s’artista de Israele, nd’at boddiu fischius medas, comenti fut giai sussediu a innantis de sa finali, aici comenti est stetia pigada a fischius sa giuria candu at votau. In foras, in su fratempus, manifestada in favori de is palestinesus e intru de is manifestantis finas Greta Thunberg cun sa kefih a dd’ingiriai su sugu. in manifestantis ant cicau de s’acostiai meda ma funt stetius frimaus de sa politzia a duxentus metrus de s’imbucu a sa Malmo Arena. A s’acabbu Golan est lompia sa de cincu, massimamenti po minescimentu de su Televoto aunia at pigau 323 puntus.
In pissu de su palcu non funt mancaus is artistas chi ant chistionau de pagi, comenti sa portoghesa Iolanda o comenti su francesu Slimane chi at aboginau: “Unius de sa musica, de s’amori e de sa pagi”. In signu de morrungiu si funt postus a un’ala is portabogis de is giurias Alissandra Mele po sa Norvegia e Kaarija po sa Finlandi.
Non feti sa guerra in s’Orienti de mesu ma finas cussa in Ucraina at agatau bogi.
Màuru Mura
Cenarba, su dexi de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.donnaglamour.it/chi-e-nemo-mettler/curiosita/
