S’inflatzioni non lassat in pagi is trabbagliadoris e is pensionaus, massimamenti chi bivint in Sardigna. Su pretziu de abba, pani, lati, carburantis e atras necessidadis funt bessius a is steddas, in su mentris chi is stipendius, cun cuntratus frimus de prus de degi annus, e pensionis (chi funt bessias de cuatru eurus!) non ce dda faint a cumbatiri.
E sa poberesa s’amostat finas in sa saludi, poita, in custas dis de calori meda, non totus si podint permitiri de pagai sa currenti, chi costat cantu de un’ogu, po alluiri is cunditzionadoris o, ancora, po andai a si fairi curai de dotoris o clinicas privadas: su dinari non bastat.
Ocannu a fairi is comporas costat 1.824 eurus in prus, cunfroma a su 2021. Est totu cussu chi ndi bessit a pigliu in sa cica de su Centro Consumatori Italia (CCI). Est a nai ca in su 2021 po fairi sa spesa, po unu mesi, si pagaiat 480 eurus (aici narat s’Istat) e in su mesi de làmpadas passau, invecias, tocaiat a ndi bogai de buciaca 632 eurus. Duncas 152 eurus in prus a su mesi chi bolint nai 1.824 po totu s’annu.
Calencunu esempiu de cantu funt crescius is pretzius, in is urtimus cinc’annus, est custu: Su lati friscu est passau de 1,60 a 2 eurus; su cafeu de 1,10 a 1,40; sa bombola de su gas de cuindigi chilus portada a domu de 35 a 40 eurus; su pani est passau de 3,03 a su chilu in su 2021 a 4,99 de ocannu; sa pasta de 1,34 a 2,19.
Su limoni est bessiu de 1,84 a3 eurus, sa carota de 1,27 a 2; sa patata de 1,19 a 1,95. Po sa petza ancora peus e tandu agataus sa pudda de 4,22 a 7,60 a su chilu, is coscias de pudda de 3,70 a 6,90; su macinau de vitellu de 7,99 a 14,45 e su presutu cotu de 18,34 a 28 eurus a su chilu
“Est unu disacatu mannu po chini trabbagliat e po is pensionaus”, narat Simoni Garau, numuru dus de s’Adiconsum, chi narat sa sua fueddendu de “speculatzionis”. Po is sardus est ancora peus ca: “Po mori ca sa Sardigna est un’Isula, totu costat de prus cunfroma a s’orrestu de s’Italia”.
Foto: https://www.ilsole24ore.com/art/carrello-spesa-quarto-e-prodotti-italiani-AEmjU8RB
