Peruna arrasta de Francisca Deidda, sa picioca chi biviat in Santu Sparau e sparessia de sa metadi de maju chena donai peruna noa a sa familia sua, est stetia agatada oi, in s’erriu Picocca aunia funt cichendu. Mancu su cani “molecolari”, lompiu de Bologna eris, at agatau nudda. Po immoi, sa giustissia, est cunvinta chi sa femina est stetia bocia de su pobiddu Igor Solai, chi s’agatat in presoni de una bona pariga de dis in Uta cun sa curpa de dd’airi morta e atacau su corpus. Sa cica est sighia de custu mengianu cun su cani domau po agatai corpus de ominis e feminas in decompositzioni. Funt partius in sa cica de su chilometru 37 de sa statali becia 125 “Orientali Sarda”, in Santu Pilimu, in su sartu de Santu Idu, aunia giai de sa prima dì furint stetius agataus un’orrogu de corona bruta de sanguni, unu “bite” po is dentis, unu beauty case e un’orrogu de una felpa, finas custu cun arrastas de sanguni, chi totu faiat pensai chi funt de Francisca.
Difatis eris is specialistas de su Ris ant fatu connosciri is esaminis biologicus in pissu de cussu chi iant agatau: est a nai ca totu apartenit a sa picioca sparessia. Is esaminis ant essi possius fairi finas de is peritus de sa parti de Igor Sollai.
Po sa cica de custu mengianu si funt agataus unu numuru meda prus basciu de carabineris po non donai disturbu a su cani chi s’est moviu de s’erriu Picocca, chena cuasi de abba finas a totu s’atra parti de sartu a ingiriu.
Cras Igor Sollai at a depiri arrespundiri a is preguntas de su publicu ministeru Marcu Cocco, chi est difendiu de is abogaus Carrulu Demurtas e Laura Pirarba. At essi sa borta de dus, ma po immoi Sollai no at arrespustu a nudda e antzis negat totu.
A dda castiai de foras est postu mali de averas ca totu fait pensai cussu chi is magistraus giai tenint in conca: parit totu craru!
A dogna manera is abogaus aspetant s’udientzia de martis chi benit, su bintitres de mesi de orgiolas, in su Tribunali po cicai de fairi libertai su pobiddu incurpau de essiri unu bocidori.
Màuru Mura
Mercuris, su dixiaseti de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.quotidiano.net/cronaca/francesca-deidda-scomparsa-ricerche-u9mm0tae
