De su Cumunu de Casteddu e de sa Protetzioni civili lompint is “regulas” po cumbatiri contras de su problema de s’abba. Difatis, de Palatzu Bacaredda, in dd’unu paperi, erribant is indicus donaus de su “Distretto Idrografico po s’emergentzia idrida de su 2024”. Massimamenti funt consiglius e manera giustas de umperai s’abba chena essiri sperdissiaus, chi balint po is familias ma fians po is logus de trabagliu.
De sighiu is regulas consigliadas.
Domus e postus de trabagliu: Donai orrubinetus cun su dispositivu “frangi-getto”, chi facant risparmiai abba; castiai beni chi sa filera de s’abba non perdat; non lassai calai s’abba chena dda umperai (comenti candu si samunant is dentis o candu si fait s’arba); non umperai s’abba po samunai sa fruta e sa birdura: bastat a dd’as lassai in s’abba cun dd’unu pagu de bicarbonau; candu si podit fairi umperai s’abba giai umperada (est a nai s’abba de sa pasta podit essiri umperada po samunai su stregiu e cussa umperada po samunai sa fruta po dda donai a is matas); umperai sa lavatrice o sa samunastregiu feti candu est prena; umperai su scarrigu de su comudu feti in parti pitica; preferri s’umperu de sa docia invecias de cussu de sa vasca, ca est prus lestra; candu si bessit, po tempus meda, de domu, serrai s’orrubinetu centrali; non umperai s’abba potabili po samunai machinas o po is giardinus;
Chi s’abba benit suspendia:
Fairi scortas de abba, massimamenti po su bagnu e sa cogina e tenni in domu pratus, tassas, fruchitas, cuglieras e corteddus chi si possant umperai e fuliai; morri su caglientabba eletricu e ddu torrai a alluiri a pustis chi torrat sa currenti; candu s’abba torrat non umperai inderetura sa lavatrice, sa samuna stregiu o su caglientabba.
“Su Cumunu de Casteddu – acabbat su paperi – cumbidat totu sa genti e is siendas de tenni presentis custas regulas po cicai de afrontai meglius sa crisi de s’abba”.
Màuru Mura
Martis, su bintises de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.greenme.it/ambiente/acqua/crisi-idrica-10-regole-citta-risparmiare-acqua/
