“Bonu merì, ia bolli comporai totu is librus chi s’agatant in sa vetrina”. Prenda de deximila eurus po unu comporadori de misteriu chi dis pagas a oi est imbucau in sa libreria famada Hoepli, in Milano, comperendu duxentus libburus intregaus massimamenti a arti, storia, filosofia e politiga.
Unu contu de non creiri e difatis is butegheris de libburus ant deicidiu de lassai sa vetrina sbuida po calencuna dì cun dd’unu messagiu: “Scusanoisì, eus bendiu totu”. Non s’agatat un’arregioni po is titulus comporaus intru de autoris e chistionis. Est de averas una compora spantosa, ca a comporai deximila eurus de libburus no est cosa de dogna dì, chi fait pensai de prus a un’abbisongiu urgenti de preniri unu mobili in domu invecias de unu chi ligit meda. Giobia passasa, contant a sa Hoepli, “un’omini s’est acostiau a una trabbaglianti e at pediu, chena duda peruna, de podiri comporai totu is libburus chi s’agataiant in sa vetrina. Tandu un’atra truma de trabbagliantis at pigau totu e, fendu su contu, ddus at postus in is bustas de tela de sa libreria, cussus cun is fueddus famaus ‘Deu ligiu libburus!”. In segus s’omini at pagau cun su paperi de creditu chena pediri nudda e s’est stesiau in pissu de unu tassì”.
“Una compora spantosa. Soi abarrau a buca oberta e mi soi pregiau chi calencunu apat agatau sa vetrina aici galana de dda bolli comporai totu. Fueddau de una vetrina longa po cincu metrus e arta po tres metrus”, at contau a su Corriere dall Sera Mateu Hoepli, de s’arrempili de Ulrico Hoepli, svitzeru diventau italianu chi a s’acabbu de su 1800 iat obertu sa libreria – e sa domu imprentadora – in su centru de Milano e chi immoi s’agatat in s’orruga intregada a Hoepli e totu.
“Non connosceus peruna cosa de su comporadori e non scieus s’umperu chi at a fairi de is libburus”, narant de sa domu imprentadora, ponendu in evidentzia ca sa vetrina comporada “est feti una de is medas de sa butega. Custa fut prena massimamenti de libburus de storia, politiga e arti, de is calis calencunu in limba ingresa”.
“Custu contu – acabbat de nai Mateu Hoepli – nos at imparau ca non si scit mai cussu chi possat sussediri. Est de cincu generatzionis chi sa famiglia mia trabbagliat in is libburus e una chistioni aici non dd’apu mai intendia in is contus de is nannais e bisajus mius. Immoi deu dd’apa podiri contai a figlius e nebodis”.
Màuru Mura
Giobia su bintinoi de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: chrome-extension://fheoggkfdfchfphceeifdbepaooicaho/html/site_status_block_page.html
