Puntu de oru cussu chi su Casteddu si ndi leat de Venaria contras de sa Juventus. Ddue pistant is barras po meda is arvus e nieddus e si pigant su primu gol contras, fatu de Marin de is undixi metrus. A s’acabbu, cun su palu boddiu de Obert, su Casteddu erriscat finas de binciri sa partida.
Davidi Nicola giogat cun su matessi schema, est a nai su 4-2-3-1, umperau lunis in sa partida binta in Parma cun feti unu mudamentu: Augello in artu in sa parti de manca de su campu a su postu de Luvumbo.
Su primu tiru est de su Casteddu candu Di Gregorio parat su tiru de Viola de foras de area. Arrespundit sa Juventus ma Scuffet est in atentzioni cun Savona, chi non si sciat eita boliat fairi. A cuasi unu cuartu de ora de su cumentzu s’arbitru donat unu rigori a sa Juventus chi ndi fait pesai is morrungius de totus. Difatis no est craru meda chi Luperto tochit cun sa manu sa bocia. A dogan manera Vlahovic segnat e aici is piciocus de Thiago Motta acabbant sa parti de unu de partida in vantagiu chena non airi spantau a nemus.
In sa parti de dus, su matessi, is giogarodis de sa Juventus no est chi facant cosas mannas. E dapoi chi Vlahovic si ndi papat unu gol chi iat airi fatu finas unu pipiu s’arbitru, cun s’agiudu de su Var, donat unu rigori a su Casteddu chi fut craru comenti de s’abba. Ddu tirat Marin e fait gol e fait finas giustitzia. A su minutu de noranta s’arbitru e totu ci stupat de su campu a Conceição chi ddu boliat cogliunai betentudusì a sa sola in area. Non funt mancu serbius is otu minutus in prus de is noranta e antzis est su Casteddu, cun su palu de Obert, a erriscai de binciri.
Cuntentu e allirgu meda Nicola a s’acabbu de sa partida: “Besseus de cincu a ses puntus e nosi acostaus a nosi sarvai, chi est s’obietivu nostu”.
Sa partida de su benienti at essi cun su Torinu de Vanoli intru de duas cidas.
Màuru Mura
Lunis, su seti de mesi de talamini de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=2vUU8mKT5gs
