Tres annus a immoi, de custu tempus, su Casteddu binciat una partida cun sa Fiorentina po 5-2. De spantu sa dì comenti iat giogau Nainngolan. S’europa fut inigui de pigai e su Ninja fut cussu chi agiudaiat a dda bisai. A pustis cussu chi est sussediu a sa scuadra e a unu de is giogadoris prus fortis chi apant bestiu sa maglia casteddaia, chi oi tenit trintacuatr’annus, est scritu in sa storia.

Eita at fatu immoi de aici legiu Radja? Ddu iaus lassau, po airi guidau chena patenti, a s’obrigu de abarrai in domu. A innantis, sa patenti de guida si dda iant arretirada e iat airi depiu fairi un’atru esamini po dda torrai a pigai, sonumancu aici chistionat chini connoscit su contu. Una cosa est segura: in Belgiu, de certu, is regulas funt prus sighias che in Italia e non castiant in faci a nemus: podis essiri famau, erricu ma sa lei abarrat sempiri lei po totus.

Dominigu s’Anversa, chi est sa citadi aunia est nasciu e pesau su Ninja, de fatu a ddu airi postu foras scuadra, at fatu sciri de airi decidiu, in segus a un’atobiu cun su giogadori, po ddu bendiri. Funt de acordiu sia issu che sa sociedadi.

In is social is tifosus pigant positzionis diversas: c’est chini ddu cundennat chena farta, chini ddu bolit sarvai, ma finas chin ddu consigliat de si ndi torrai in Casteddu. E a sa scuadra de Liverani unu comenti Nainggolan iat serbiri che su pani po unu mortu de famini, ca su giogadori belga prus de essiri unu leader est unu grandu motivadori po is cumpangius.

Ma, in realtadi, chi Radja torrit a giogai po su Casteddu parit dificili meda. Is giornalis sportivus ddu ant acostau a su Brescia de Massimu Cellino, su presidenti chi ddu at fatu bolai in su fubalu mannu, ma a pustis is dimissionis de Cellino comenti presidenti de su Brescia, custa bogi puru parit chena benidori.

Coidendu s’at a connosciri aunia at andai a acabbai sa carriera. Chena pensai a is sciollorius chi at fatu foras de campu, chi bortas medas depint essiri lassadas a un’ala, Nainggolan est unu chi at sempiri donau totu candu at giogau. Famaus funt is fueddus chi prus de una borta at umperau: “Deu in campu apu sempiri donau totu, cussu chi facu a fors non depit interessai a nemus”.

 

 

Màuru Mura

 

 

 

Mercuris, su 16 de Sant’Andria de su 2022

 

 

Foto: https://www.sportface.it/calcio/calcio-estero/nainggolan-su-instagram-alcuni-guadagnano-parlando-di-me-nessuno-sottolinea-la-beneficenza-che-faccio/1960209