Is possibilidadis de un’acordiu intru de Azione e Partidu Democratigu si funt giogadas totus in su atobiu de eris mengianu in sa Camera. E s’arresurtau est ca “s’acordiu c’est”.
A ddu nai funt Calenda e Letta in un’atobiu cun is giornalistas in sa Camera e totu, aunia ant spiegau comenti s’ant dividiri is zonas chi ddus fait curriri paris a is eletzionis benidoras de su 25 de cabudanni cun +Europa de Benedetto Della Vedova.
Su “leader” de Azione ddu iat nau a su segretariu de su Pd, Erricu Letta: “Nosi bieus cun +Europa e serraus o in d’una manera o in s’atra”. E Letta at arregortu “chena ponni regulas”.
“Bosi feus sciri chi a sighiri de un’atobiu intru de is ominis de is dus partidus eus, nosi seus postus de acordiu. Un’acordiu po nosu de importu mannu – is fueddus de Letta – un’intesa eletorali, cun atrus puru chi po nosu funt de importu mannu po binciri is eletzionis”.
“S’alleanza chi eus fatu oi – at sighiu a nai su segretariu de su Pd – fait in modu ca is eletzionis ant essi a sa pari, eus ritenniu doveri nostu donai de is pensadas chi cunvincant sa genti e chi nosi permitant de binciri”. “Eus fatu biri ca teneus una responsabilidadi manna – at ancora nau Letta – s’Italia balit de prus de invecias de is certus”. “Non si podit pensai chi s’Italia, a pustis Draghi, bengiat donada in manus a sa drestra o ghiau de Giorgia Meloni – at acabau Letta – de fatu de Draghi s’Italia abbisongiat de unu guvernu chi portit a innantis programas chi ant tentu sucessu mannu”.
“Seus prontus a andai totu paris, nudda est scritu, andaus a binciri is eletzionis, de oi po mimi dogna chistioni est acabbada, nosi giogaus custa partida po dda binciri”, at invecias nau su “leader” de Azione, Carrulu Calenda. Chistionendu de Renzi, narat sempiri Calenda: “Is jannas funt obertas po totus e deu c’apu pensau meda. Est craru a totus ca immoi a segai fait pigai prus numurus, ma non si fait sa politiga po is numurus. Non creu chi nemus apat nau ca nou po amanniai sa coalitzioni”.
Màuru Mura
3 de austu de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.avvenire.it/attualita/pagine/calenda-pd-ecco-l-accordo
