A innantis at donau fogu a sa vetura aunia s’agataiat sa pobidda e a pustis, candu custa est arrennescia a ndi bessiri, dd’at pigada, frimada e bòcia cun is manus suas.
Su contu de sanguni est sussediu in su sartu de Gravina de Puglia, stesiau de una sessantina de chilometrus de Bari. Un’omini de sessantacinc’annus, giai connotu de sa giustissia, est stetiu acapiau de sa politzia cun sa curpa de airi bòciu sa pobidda. Si tzerriat Giusepi Lacarpia.
Sa femina, de sessant’annus, si lamaiat Maria Arcangila Turturo. Su contu est sussediu s’atra dì e sa Turturo, ricoverada in su spidali, a innantis de si morri est arrennescia a contai cantu sussediu a sa figlia e a is politziotus. “Mi boliat bociri, m’at postu is manus in is gangas, m’at serrau aintru de sa vetura chi fut abrugendu”, custus is urtimus fueddus de Maria Arcangila Turturo.
Po cantu asi connoscit de sa chistioni, s’omini iat airi postu fogu a sa vetura sua cun aintru sa pobidda chi, a dogna manera, ce dd’at fata a bessiri cun abrugiaduras in su corpu. Boliat cogliunai fendu amostai chi si trataiat de un’incidenti, ma non ce dd’at fata po nudda. Candu sa femina est arrennescia a nci bessiri dd’at frimada, palas a terra, in su caminu e dd’at cracau in pissu corpus e brassus e unu genugu in sa brenti. Aici dd’at causau fraturas a is costas e a su neuladori chi ant cracau su coru.
A totu custu ant assitiu prus de unu testimongiu: una picioca, chi s’agataiat in is orus cun su sposu, at pigau su telefoneddu de sa buciaca e at fatu unu videu. Si creiant, sposu e sposa, de s’agatai indenanti de unu incidenti in camini cun dd’una vetura in pampas e si funt frimaus po lamai agiudu e invecias funtiri castiendu unu pobiddu chi bociat sa pobidda. Si dde amostada, in su videu girau de sa picioca, Giusepi Lacarpia in pissu de Maria Arcangila Turturo cun is genugus a dd’acracangiai.
Màuru Mura
Martis, s’otu de Santu Antine de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.uilmilanolombardia.it/femminicidio-studio-uil/
