Elly Schlein s’atru mengianu est lompia in Nugoro po su caminu de unu de su giru eletorali in Sardigna po cicai de agiudai sa candidada de is europeas benientis, de su seti e otu de làmpadas, Angila Quaquero.
At chistionau in s’Isre e sa segretaria de su partidu democratigu at nau craru e tundu, intru de atras cosas: “Sa Sardigna a pustis sa torrada eletorali de su binticincu de friargiu po is regionalis s’est torrada a donai una spera manna cun sa vitoria de Alissandra Todde e de sa parti progressista. Immoi serbint atrus numurus po sighiri in pissu de custu caminu, massimamenti po cantu pertocat sa torrada de is comunalis po Casteddu, Tatari e Salighera”.
“Nosu ddue seus ponendu totu s’impignu chi podeus – at aciuntu ancora sa segretaria de su Partidu Democratigu – difatis deu ddue pongiu sa faci e soi sa prima de sa lista in sa filera de is Isulas. Seus innoi po cicai, cun cunvintzioni manna, de agiudai Angila Quaquero e boleus donai testimonia de essiri a su costau de custa terra de ammaju e portai una spera a chini pensat chi a votai non possat fairi sa diferentzia”.
Po sa chistioni de is emergias rinnovabilis, invecias, sa segretaria demogratiga narat: “No est cun sa speculatzioni de is multinatzionalis chi imboddiant cun s’eolicu e su fotovoltaicu is regionis nostras chi nosu eus a fairi sa transitzioni energetica, ma feti ponendu in mesu sa genti de su logu e fendu decidiri a issus aunia e comenti fairi sa transitzioni”.
A erriciri sa Schlein in Nugoro, aunia est lompia tempus pagu a innantis de mesudì, ddue fut su segreetariu regionali de su Partidu democratigu, e presidenti de su Consigliu Regionali, Pieru Comandini e su segretariu provinciali Giusepu Ciccolini.
A pustis de Nugoro Elly Schlein s’est dirigia in Nuraghe Losa e Porto Ferro e in segus in Salighera cun su candidau sindigu Arremundu Cacciotto e in Tatari cun s’atru candidau Giusepu Mascia.
Màuru Mura
Martis, su bintunu de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ilpescara.it/politica/elezioni/elly-schlein-elezioni-europee-17-maggio.html