“Is Stadus Unidus de America ant a pigai Gaza a suta de sei, at essi unu caminu longu in su tempus, ma chi at a portai pagi e stabilidadi po totu s’Orienti de mesu e Gaza e totu at essi sa riviera de su matessi Orienti de mesu”. Ddu at nau su presidenti americanu Donald Trump in dd’unu atobiu cun is giornalistas. A su costau de sei si ddue est agatau finas su capu de Israele Benjamin Netanyahu e Trump at, dapoi, sighiu nendu ca “is palestinesus depint lassai Gaza e biviri in atrus logus in pagi”.
Chi in segus at finas nau atru: “Sa spera est de fairi calencuna cosa de bellu, aici bellu chi non ant a bolli torrai. E poita depint torrai? Cussu logu est stetiu un’inferru”, is fueddus de Donald Trump chi at chistionau duncas de unu trasferimentu de is palestinesus in logus aici “bellus” chi “no ant a bolli torrai”. In su mentris chi is Stadus Unidus iant a depiri pigai po sei su logu e sa propriedadi a caminu longu de sa Striscia de Gaza, po dda torrai a fraigai e po dda mudai in sa “Riviera de s’Orienti de mesu”.
Po Trump giai sa Giordania e giai s’Egitu ant essi a disponimentu po collocai is palestinesus: “Sciu ca bos ant nau ca non funt de acordiu, ma deu bosi nau ca eja. E soi seguru ca ant essi finas atras natzionis a essiri de acordiu”.
“Ses s’amigu prus mannu chi Israele at tentu comenti de presidenti de s’America”, is fueddus e Netanyahu, arremonendu s’iscostiadura de s’ambasciada Usa in Gerusaleme, sa bessida de s’acordiu in pissu de de su nucleari cun s’Iran, is Acordius de Abramo, totu sussedius intru de sa presidentzia de unu de Trump. “Naras cosas chi is atrus non narant e totus abarrant a buca oberta, ma a pustis si scrafint sa conca po nai ca tenis arregioni”, sempiri is fueddus de s’israilianu.
Inderetura Hamas at arrespustu cun custus fueddus: “Ridiculu. Una pensada che-i custa podit ponni atru fogu in totu sa Regioni”.
Màuru Mura
Giobia, su ses de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.avvenire.it/mondo/pagine/il-piano-di-trump-fare-di-gaza-la-riviera-americana-senza-i-palestinesi
