Sa Sardigna in zona orrubia po s’erriscu de mortus in is logus de trabbagliu. A ddu nai est s’urtimu indagu de s’Osservatoriiu Seguresa in su Trabbagliu e Ambienti Veda de Mestre, chi fait connosciri comenti in s’Isula s’agatit una “incidentzia de errisvu” de prus de su 25% cunfroma a sa media natzionali. No est cosa bella custu postu de unu chi sa Sardigna cumpartzit cun sa Valle d’Aosta, Trentino Alto-Adige, Puglia, Calabria e Umbria.
“S’incidentzia de is mortus – spiegant de s’Osservatoriu – est s’indicu de trabbagliadoris mortus in su mentris chi funt trabbagliendu in sa regioni o provincia, cunfroma a dogna milioni de ocupaus chi s’agataiant in sa matessi. Custu serbit po fairi cumprendiri custa chistioni intru de is diversas regionis, finas chi is trabbagliadoris funt diferentis”.
In Sardigna, aunia trabbagliant in 567 mila personis, de su cumentzu de annu ci funt stetius cincu mortus, po un’incidentzia de su 8,7 contras de una media natzionali de su 6,4.
“Seus lompius a is primus tres mesis de su 2024 – is fueddus de Mauru Rossato, presidenti de s’Osservatoriu Veda – e, a dolumannu, e is numurus benidoris prus sighint a abarrai su matessi e finas peus”.
Is numurus de s’Osservatoriu funt spantosus e legius: “Funt centunorantunu is mortus intru de su trabbagliu, de is calis centucincuantunu in su trabbagliu e totu e coranta in viagiu. Sa regioni peus est sa Lombardia cun 28 e a sighiri agataus sa Puglia cun 15, Emilia Romagna cun catodigi, Campania cun dogi, Latziu e Toscana cun undigi, Piemonti cun degi, Trentino-Alto Adige e Sicilia cun noi, Calabria cun sesi, Veneto e Sardigna cun cincu, Liguria cun cuatru, Umbria e Friuli cun tresi, Valle d’Aosta e Marche cun dus. Feti sa Basilicata cun su Molise non ant connotu mortus. Imbiaus!
Sa parti manna de is mortus s’agatat in sa filera de is Costrutzionis.
Màuru Mura
Dominigu, su cincu de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.cgilchieti.it/cgil-abruzzo-e-molise-morti-sul-lavoro-comunicato-stampa/
