In Milano, in sa manifestada aprontada de Carrulu Calenda, si funt atobiaus cussus chi non bolint s’acabbu de sa gherra po fortza e chi massimamenti, ci tenint a ddu nai, non bolint chi sa pagi bogliat nai ca s’Ucraina s’arrendat.
Prus bogis e chena ponni peruna mesura, invecias, in Roma, aunia in prassa funt calaus su mundu de is sotzius, laicus e catocilus, Acli e Arci, is sindacaus, su sotziu contras is armas, su Partidu Democratigu, is Steddaus e sa cungrega de is birdis cun sa manca italiana.
“Seus prus de centumila”, ant fatu sciri is aprontadoris a s’acabbu de sa manifestada, chi s’est serrau in pissu de is notas de “Bella Ciao”.
Prus delicadas is positzionis: chi Giusepi Conte si dda pigat contras sa prassa de Milano (“Funt de averas po sa pagi”) e avertit su Guvernu de non pigai decisionis po mandai atras armas in Ucraina chena a innantis ndi chistionai in Parlamentu, chistionat finas de un’atobiu internatzionali “poita po immoi totu cussu chi est stetiu fatu non s’at portau a perunu logu”, c’est su Partidu Democratigu chi est a su costau de sa Nato e de is Stadus Unidus.
“Sas cosa prus de importu mannu est s’acabbu de s’invasioni russa”, at nau difatis Erricu Letta. “Po mandai atras armas eus ascurtai is fueddus de su guvernu e in segus eus a pigai una decisioni, ma eus sempiri nau ca trabbagliaus de sighiu a cussu chi at fatu su Guvernu de Draghi e in linea cun is alleantzias europeas e internatzionalis aunia seus a intru”.
Su segretariu de is democratigus est stetiu finas pigau a solidus de calencunu de is manifestantis chi ddu ant lamau “guerrafondaio e filo americano”, e ddu ant cumbidau de si ndi torrai a domu.
“Tocat a ponni cun is palas a muru Putin”, at nau Laura Boldrini, in su mentris chi Stevini Bonaccini at nau ca “abbisongiat pediri unu pagu prus de diplomatzia ma chena si ndi scaresciri ca est Putin chi at invadiu e s’Ucraina andat sustennia”.
Màuru Mura
Giobia, su 10 de Sant’Andria de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.fanpage.it/attualita/russia-ucraina-la-rete-pace-e-disarmo-litalia-sia-neutrale-non-siamo-un-protettorato-nato/
