Lompint signalis de arriolu po sa Lega de Salvini in Sardigna, donendu una mirada a is eletzionis de friargiu chi benit po is Regionalis, aunia s’ata decidiri chini po is cincus annus benientis at a cumandai. Su sindigu de Illorai, Titinu Pitanu Cau, su solu sindigu de su partidu de is lombardus in terra nosta, at pigau sa decisioni de ci stupai de su partidu.
Po su sindigu est una decisioni chi “non podit torrai in peruna manera a palas”, si ligit in sa litara de dimissionis scrita a su capu de sa Lega Mateu Salvini, “poita non s’agatat prus cussa fiducia in is relatas istitutzionalis, chi invecias serbint purs che a totu po cicai de fairi a su meglius su sindigu”.
Titinu Cau est sindigu de su 16 de làmpadas de su 2019 e oi scoviat ca ddu anti “lassau a sa sola a-i cussas personis de sa nostra truma politiga chi, a fueddus, sa d’ chi apu bintu is eletzionis, funti totus a su costau miu, allirgus e chi mi faiaint fortza”.
Fueddat duncas de Eugeniu Zoffili, su parlamentari e coordinadori de su tempus de sa Lega in Sardigna ca “candu apu giurau at nau publicamenti e a totus ca po Illorai sa Lega e su guvernu centrali iat airi fatu unu progetu pilota. Est a nai ca po immoi no eus bidu né su progetu e nemancu su pilota”.
Torrat, perou, gratzias a Dariu Giagoni, deputau e coordinadori beciu, finas issu, “po s’impignu mannu chi nos at amostau: de candu soi stetiu sindigu nos at sempiri agiudau, cun issu eus sempiri tentu una relata manna e gratzias a su trabagliu fatu paris ce dda eus fata a pigai dinari po fairi operas comunalis de interessu po totu sa comunidadi”. Su sindigu at finas nau ca prus de una bia at scoviau totu custu a genti meda de sa Lega, intru de custus finas a Claudiu Borghi, ma chi su chesciai no est serbiu a nudda o forsis no est lompiu a nemus. Eus a benni a biri comenti s’acabbat.
Màuru Mura
Giobia, su bintunu de mesi de Idas de su 2023
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://it.wikipedia.org/wiki/Illorai
