Mancant is citadis prus mannas de sa Sardigna, ma ant essi cuasi sa metadi de is sardus a andai a votai su 7 e s’8 de làmpadas po fairi is sindigus nous. Difatis, sa Sardigna, in cussas duas dis s’at a votai in 149 comunus in pissu de 377. Po sa prima borta s’at a fairi su sparegiu in pissu de is comunus chi non si prenint prus de cuindixi mila abitantis.
E aici, in prus de Cuartu, Porto Torres e Sestu, su bintunu e su bintidus de làmpadas, podint essiri lamaus a torrai a votai finas is citadinus de Tempiu, chi si poderat paris a Terranoa sa pronvincia de Gaddura, e Sanluri, chi paris a Biddecidru funt is capus de sa provincia de su Campidanu de mesu.
Est de nai ca c’at tempus finas a sabudu chi benit po presentai is listas chi ant a cuncurriri.
Intru de custas eletzionis sa partida chi amostat prus interessu est cussa de sa tertza citadi de s’Isula, Cuartu. Su sindigu chi at prenu is urtimus cinc’annus, est a nai Gratzianu Milia, si torrat a ponni in lista po su benienti. Sa coalitzioni sua sighit a puntai a intru de sa sociedadi civili, ma at finas pigau s’agiudu de partidus politigus medas chi, a dogna manera,si funt spogliaus de is simbulus. E duncas, at essi totu su Campu Largu cun finas is Steddaus e su Partidu Sardu de Atzioni ghiau de Christian Stevelli chi in is urtimas aministrativas fut su candidau de su centrudrestra contras de Milia e totu. Po cantu pertocat su matessi centrudresta at essi Marcu Porcu, de is Fradis de Italia chi at fatu s’assessori regionali a s’Ambienti cun sa giunta Solinas, a cuncurriri po diventai sindigu. In su mentris ca Orrobertu Matta, cun sa lista civica Turismo e Progresso, at essi s’atru candidau a sindigu.
Atra citadina suta atentzioni est Porto Torres, aunia su centrumanca torrat a candidai su sindigu de is urtimus cinc’annus, Massimu Mulas, chi si dda depit biri cun atrus tres. Su centrudresta ponit in campu a Ivan Cermelli de sa Lega, Sara Dettori at a ghiai una lista civica e identitaria e Loredana Demarco cun sa lista “Portotorres”, chi si ndi pesat gratzias a s’alleantzia intru de is ativistas de su logu de is Steddaus, Manca benienti e Sardigna lamat Sardigna.
