Su corpus de Gino Strada, mortu in Normandia, in Francia, dì innanti eriseru a setantatres annus, at a torrai in Italia sa cida ch’intrat. Ddu faint sciri de Emergency, sa ong chi su dotori milanesu nd’at pesau trint’annus a oi po assistiri sa parti prus debili de su mundu. Sa pensada est cussa de fairi saludai Gino de totus cussus chi ddi boliant beni.
Eriseru a mengianu calencunu at lassau unu massu de froris, in s’intrada de Emergency in Milanu, po arregodai cust’omini chi at lassau un’arrasta manna po totus.
“Mirai, in su mentris chi babbu si moriat, deu fui fendu custu”, at scritu sa figlia Sessilia in Twitter, amostendu unu videu de sa navi ResQ – People saving people chi sarvaiat ominis e feminas in mari. “Una vida chi bolaiat e otantacuatru chi torraiant a nasciri. Mi parit ca sa manera de ddu saludai ddi iat at essi pragiu – at sighiu Sessilia – Adiosu babbu, bonu bentu, mari frimu”.
In su fratempus in Milanu, sa citadi sua, s’est pensendu, giai de imoi, a dd’intregai calencunu logu. “Soi seguru chi Milanu at agatai sa manera megliius po arregodai Gino Strada, intreghendudeddi unu logu dhi podit essiri una prassa, un’orruga o unu parcu”, at scritu su deputau europeu de su Partidu Democratigu, e finas assessori comunali beciu de sa citadi lombarda, Pierufranciscu Majorino.
Est su prus pagu chi si possat fairi po unu comenti Gino Strada, a parrer nostu in dogna logu si depiat intregai calencuna cosa a su dotori de is urtimus. Chi in su mundu s’agataiant prus ominis comenti de Gino e calencunu de mancu chi semenat odiu, totu andaiat meglius, ma non podeus tenni totu custu chena sighiri s’orruga chi Strada nos at amostau. Eus benni a biri chi custa borta sa cuscentzia de is ominis at a portai a s’arregodai, po imoi seus allirgus chi sa genti chi teniat cosa de nai candu Gino fut in vida, no at nau nudda: sighei a abarrai citius!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.ilmessaggero.it/persone/gino_strada_morto_emrgency_anni_ultime_notizie-6136760.html
