Is Savoia bolint a secus is prendas de sa Corona, chi de su mesi de làmpadas de su 1946 s’agatant in d’unu scusorgiu de sa Banca de Italia. Prenda manna de 6.732 brillantis e duamila perlas, mannus e piticus. S’abogau de sa familia de is reis, Sergiu Orlandi, s’at a atobiai cun is reparensentantis de sa Banca, de sa Presidenza de su Consigliu e de su ministeru de s’Economia. S’atobiu, decidiu de Giuanni De Luca, est aprontau poita ddu ant pediu su principi Vitoriu Emanueli de Savoia e is principessas Maria Grabiela, Maria Pia e Maria Beatrice, chi funt is figlius de su Rei Umbertu II, passau a sa storia comenti “su Rei de maju”.

Est probabili meda chi s’atobiu no at a serbiri a nudda, ma si scit giai ca is Savoia no ant lassai a perdiri e pensant de denuntziai su Stadu italianu.

Giai un’atra borta, su 29 de Sant’Andria de ocannu passau, is Savoia, sempiri po bogi de s’abogau Orlandi, iant pediu is prendas a sa Banca de Italia. Orlandi iat pigau pinna e paperi e iat scritu. Is abogaus de sa Banca, Marcu Di Pietropaolo cun Olina Capolino, non ci iant postu meda a arrespundiri, giai sa dì infatu, su trinta, faiant sciri: “Non torraus nudda, tocat a tenni contu de is responsabilidadis de chini at depositau”.

Est una chistioni oberta de meda, a dogna manera, poita is prendas mai funt stetias secuestradas de su Stadu a s’imbessi de totu is atras errichesas de is Savoia: domus, casteddus, terrenus, bingias e ortus. Propriu po custu, s’abogau Orlandi, pensat de oberri un’ocarxu.

Po cumprendiri is arregionis tocat a torrai a is dis infatu de candu est nascia sa Repubblica cun su scioberu de is italianus, su dus de làmpadas de su 1946. Tres dis a pustis su ministru de is Realis, Falcone Lucifero, incarrigau de Umbertu II dunsignat is prendas a su guvernadori de sa Banca, Luisu Einaudi. In su paperi de cunsigna si ligit ca is prendas funt donadas a sa Banca po ddus allogai e custu fait pensai a Orlandi ca “Is Savoia, eis a biri, ant a torria a pigai is prendas de familia”.

Bortas meda castiaus su mundu cun ogus spantaus. custa est una de cussas bortas: su spantu de sa faci de sola de custa genti, chi depiat tenni feti bregungia!

 

 

26 de gennargiu de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://it.wikipedia.org/wiki/Umberto_II_di_Savoia