Narai sa beridadi ca seis spantaus a pustis custu puntu pigau in domu de s’Inter? A pustis su paregiu sa dì de su lunis de Pasca cun su Verona, in sa Unipol Domus, totu is tifosus funt arriolaus po is tres partidas benientis cun s’Atalanta, s’Inter e sa Juventus de Allegri. Invecias, po immoi, in duas partidas, chi in su paperi pariant giai perdias, funt lompius giai cuatru puntus. E a ncora no est acabbada.
Dapoi de is tres puntus pigaus cun s’Atalanta, chi funt spantosus cussus puru, oi est erribau custu paregiu chi bolit nai meda e non pagu. S’inter, giai ddu scint totus, giai lunis chi benit podit binciri su scudetu. E chi no est lunis at essi a s’atra cida. Su Casteddu, cun s’undixi de su cumentzu chi in tifosus medas ant criticau, at poderau e ce dd’at fata a si portai in Sardigna unu puntu chi contat meda, in classifica e in sa conca e in su coru de is piciocus de Ranieri.
S’Inter, a pustis unu cuartu de ora, fut giai bincendu, cun su gol de Thuram. Ma giai de comenti moviant is giogadoris orrubius e asulus, s’est cumprendiu ca calencuna cosa podiat sussediri. Difatis in sa parti de dus de sa partida, a innantis su Casteddu est lompiu a su 1-1 cun dd’unu gol galanu de averas de Shomudorov e a pustis chi s’Inter fut torrada in vantagiu, cun su tiru de is undixi metrus de Calhanoglu, a su minutu de otantatres at torrau a ponni sa partida in paridadi cun su gol de Viola, chi esta mostendusì omini de gabbale. Totus funt aspetendu sa reatzioni de sa scuadra de Simoni Inzaghi e invecias est stetiu su Casteddu a erriscai de binciri sa partida cun Viola etotu. Forsis iat essi stetiu tropu, ma, chissà, chi tres puntus cun dd’una scuadra manna no erribint cenarba. Fidi, tocat a tenni fidi, ca sa Juventus de ocannu parit cosa pagu. A batiri su ferru finas candu est caglienti, Ranieri scit!
Màuru Mura
Dominigu, su catodixi de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=xmJvOgdoJTk
