At essi unu stadiu totu po Riva, custu merì po su Casteddu chi si giogat meda, ma non totu, in sa partida contras de su Torinu de Juric. Cumentzendu giai de a innantis de sa partida, cun musicas e imaginis de s’Eroi sardu mortu s’atra dì.
Ma prus che a totu at essi una partida de importu mannu po su Casteddu de Ranieri, massimamenti a pustis sa batosta chi nd’at boddiu in Frosinone. Ma, giai si scit, ca sa truma orrubia e asula candu giogat in domu sua est totu un’atra cosa. Bastat a pensai ca innoi at sunfriu finas s’Inter e ca su Bologna, sa scuadra chi at spantau a totus finas a immoi, nd’est bessia chena mancu unu puntu. Duncas tocat a tenni fidi in is piciocus de Ranieri e chi apant imparau sa letzioni. Oi, Petagna cun Viola e Nandez, ant a tenni in bissu sa magliegedda bianca chi at a arregodai cussa de su scudetu de su 1970. At essi chena perunu sponsor e at amostai su numuru undixi de Riva cun dd’una scrita intregada a issu. Su matessi at essi po s’arbitru e po is pipius chi ant a acumpangiai is giogadoris.
Ranieri eris at fatu connosciri is giogadoris chi ant a cicai de binciri cun su Torinu. Calencunu spantu poita non s’agatat in sa lista Goldaniga, ca est in cica de un’atra scuadra chi forsi at essi su Como de Fabregas. Mancat finas Mancosu, operau a su genugu in Bologna. Intru de is convocaus finas Wieteska, chi ndi fut bessiu de su Stirpe de Frosinone cun doloris a is dentis.
A dogna manera custus funt is giogadoris lamaus de s’allenadori romanu:
Portieris Scuffet, Radunovic, Aresti; Giogadoris de difesa: Di Pardo, Zappa, Wieteska, Hatzidiakos, Obert, Dossena, Augello, Azzi; Giogadoris de mesu campu: Nandez, Makoumbou, Prati, Deiola, Viola, Sulemana, Jankto; Atacantis: Lapadula, Pavoletti, Petagna, Desogus.
Is tifosus aspetant is tres puntus, a pustis una cida de suferentzia.
Màuru Mura
Cenarba, su bintises de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.cuoretoro.it/news/328247709190/cagliari-omaggio-a-gigi-riva-maglia-speciale-col-suo-numero-contro-il-torino
