Is aprontadoris de sa cursa de sa metadi maratona de Pechinu ant fatu sciri ca funt trabagliendu po acrari cussu chi s’est amostau in sa cursa candu tres curridoris africanus ant donau s’aparentzia de curriri prus pagu candu funt lompendu a s’acabbu de su caminu, po fairi binciri sa stedda de sa cursa cinesa He Jie.
Is fotografias e is filmaus de sa cursa, chi fut dominigu passau catodigi de arbili, amostant is africanus de su Kenia Robert Keter e Willu Mnangat e s’etiope Dejene Hailu e su curridori cinesu He candu mancaiant una pariga de decinas de metrus a s’erribu: is tres curridoris africanus si ponint totu paris, andant prus a bellu de propositu cun unu de issus chi, cosa de macus,allonghiat su brassu bia foras comenti po fairi connosciri a su cinesu ca podiat passai e a is dus cumpangius de si ponni a un’ala. A s’acabbu de sa cursa, difatis su tempus de su cinesu (1 ora, tres minutus e corantacuatru segundus) fut meglius de feti unu segundu de cussus chi funt lompius dapoi. Non sempiri fait a pensai mali, ma custa borta forsis calencuna arregioni si podit agatai: totu is cuatru curridoris tenint su matessi sponsor cinesu po is crapitas chi umperant intru de is cursas.
S’Uficiu sportivu de Pechinu e s’aprontadori de sa cursa, su Beijing Sports Competition Management and International Exchange Center, ant fatu sciri ca est cumentzau un’indagu in pissu de sa chistoni e ca is arresurtaus ant essi difundius coidendu. In su fratempus He, arregodaus medaglia de oru in sa maratona in is Giogus Asiaticus de su 2023, at nau de no airi “mai fatu a innantis de oi una maratona a metadi e duncas oi apu bofiu fairi su tempus meglius po mini”, aciungendu de airi pigau in cunsideru sa cursa “comenti un’allenamtentu po is Olimpiadis de s’istadi benienti in Parigi” chi s’ant a tenni de su 26 de triulas a s’11 de austu.
“Sa spera est de amostai sa lestresa cinesa in Parigi e de dda fairi biri a totu su mundu”, at aciuntu.
Màuru Mura
Mercuris, su dixiaseti de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.today.it/persone/he-jie/
