Eriseru, a su noti, ant acapiau, in s’aeroportu de Salighera su presidenti beciu catalanu Carles Puigdemont. Ddu ant impresonau po curpa de un’ordini europeu de is autoridadis spagnolas. Giai custu mengianu su giuigi depit decidiri de ddu torrai a ponni in libertadi o chi ddu fairi erribai in Spagan.
In Alghero, citadi catalana de sa Sardigna, Puigdemont fut lompiu po intervenniri in d’unu atobiu cun is indipendentistas sardus e atobiai, tra is atrus, su presidenti de sa Regioni Christian Solinas e su presidenti de su Consigliu regionali Migheli Pais.
Comenti nd’est calau de s’aparechiu su “leader” catalanu at agatau a dd’aspetai agentis meda chi ddu ant frimau e ddu ant portau in su presoni de Bancali, in Tatari.
Sa nova at fatu su giru de su mundu e dda at arreconnota finas s’abogau de Puigdemont, Gonzalo Boy.
Su presidenti catalanu si fut fuju in Bruxelles su 30 de Santu Aine de su 2017 po si sarvai de s’ordini de impresonamentu de sa Procura de Madrid, chi ddu incurpaiat, a issu e a totu s’esecutivu catalanu, po su referendum in pissu de s’indipendentzia de sa Catalogna de su primu de Santu Aine de su matessi annu.
Puigdemont no est bofiu torrai in Spagna po donai testimonia e is autoridadis spagnolas ant ordinau de ddu arrestai in totu s’Europa, ma unu mesi a pustis dd’ant arretirau cust’orini e Puigdemont podiat andai de unu logu a un’atru in totu su mundu, ma chena podiri torrai in sa terra sua.
In su mesi de martu de su 2018 atru oridini de impresonamentu. Puigdemont venit frimau in Germania, in su mentris chi depiat torrai in Belgiu de sa Finlandia. Berlino ddu scapat ma di proibidi de lassai sa Germania, ma a pustis unu tribunali tedescu arretirat totu is mesuras. Aici torrat in Belgiu e su 26 de maju de su 2019 diventat paralamentari europeu, ma non podit torrai in Madrid po s’eletzioni ca erriscat s’acapiamentu. Madrid, difatis no ddi arreconnoscit s’immunidadi, invecias arreconnota de Strasburgo su 2 de lampadas de su 2020.
No est cun sa repressioni chi si pdint frimai is movimentus indipendentistas de totu su mundu, tocat a ascurtai cussa campana puru!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://it.wikipedia.org/wiki/Carles_Puigdemont
