Su Casteddu, a pustis is tres puntus, de importu mannu, lompius sabudu passau in sa partida contras de sa Cremonese, at a torrai a giogai cras a is noi oras mancu unu cuartu. Custa borta at essi partida dificili meda, difati est s’Inter, sa scuadra de Chivu chi est sa prima de sa classifica e cun probabilidadi at essi cussa chi bincit su scudetu, a si dda giogai contras de is piciocus de Pisacane. Una de cussas partidas perdias in partentzia ma, po chini connoscit is contus de su fubalu, podit portai cosas bonas.

In su stadiu Meazza de Milanu at essi Mateu Marchetti, de sa setzioni de Ostia Lido, a ghiai sa cuntierra. Is agiudantis, invecias, ant essi Luisu Rossi, de sa setzioni de Rovigo, e Alex Cavallina, de sa setzioni de Parma. Est finas de nai ca sa panchina de is arbitrus at essi setzia de Kevin Bonacina de sa setzioni de Bergamo.

Po preniri su paris de is arbitrus tocat a si castiai a cussus de su Var: Franciscu Meraviglia de sa setzioni de Prato cun s’agiudanti Marco Di Bello de cussa de Brindisi.

In su campionau de Serie A de ocannu, Marchetti at giai atobiau ambas is scuadras: s’Inter, su 31 de austu, in sa partida perdia in domu contras de s’Udinese (candu si fut giogada sa partida de duas de su campionau), su Casteddu in sa partida perdia, in sa Domus Arena, contras su Bologna de Italiano, candu fut su 19 de mesi de talamini e si giogaiat sa partida de seti. Cun is milanesus de s’Inter, s’arbitru de Ostia Lido at fischiau fians in sa partida de Coppa Italia cun su Torinu, de su 4 de friargiu passau, binta po 2-1. Partida, a dogna manera, giogada in Monza e non in su stadiu de San Siro.

S’urtima partida chi at bistu in campu s’arbitru de Ostai Lido, est cussa de dominigu passau intru de Milan e Udinese, acabbada 3-0 po is friulanus.

Cun su Casteddu s’est atobiau po seti bias e feti in sa de unu su Casteddu at bintu (3-1 contras de Sampdoria su 17 de mesi de talamini de su 2021. In segus funt lompias tres partidas perdias e ateretantis paregiadas. No est mancu sa prima bia chi at a arbitrai, paris, Inter e Casteddu, difati est giai sussediu su 12 de Mesi de Idas de su 2021: partida perdia de is sardus po 4-0.

 

 

 

 

Foto: https://www.canalesassuolo.it/tag/matteo-marchetti/