“Chi a intru de dexi dis non eus a tenni is arrespustas chi eus pediu a is capus de su partidu, seus custrintus a pigai una decisioni, chi at essi cussa de ndi bessiri”.
Non umperant fueddus a metadi Giuanni Chessa e Pieru Maieli, is dus consiglieris regionalis bessius de is listas de su Partidu Sardu de Atzioni chi si funt suspendius de su partidu de is bator moriteddus, a pustis su cungressu chi narant non craru, chi at torrau a ponni in sedda, comenti de segretariu e presidenti Christian Solinas e Antoni Moro.
In dd’unu atobiu cun is giornalistas, in is orus de is trabbaglius de su Consigliu Regionali, Chessa e Maieli a innantis de ci stupai de su partidu bolint crarimentus e una funduda riflessioni e “unu passu a palas de Christian Solinas e Antoni Moro”.
“Seus morrengendu poita teneus s’obietivu de fairi cumprendiri ca sa dignidadi non si podit bendiri, serbit cuerentzia e seriedadi. Perunu feli, ma una cosa depia po totu is sardus chi creint in su partidu”.
Is dus, dapoi, torrant a chistionai de sa torrada eletorali de su binticincu de friargiu passau: “Votus chi funt stetius cuasi sa metadi de cussus chi iaus pigau ciinc’annus a innantis” e de sa gestioni de su partidu: “Autoritaria e chena si cunfrontai”.
Po cantu pertocat s’urtimu cungressu, invecias: “No est stetiu craru po nudda e ddu ant fatu in manera ditatoriali”. In segus cuatru fueddus po Antoni Moro: “Po tempus meda at tirau ludu a totus, e a pustis, in manera spantosa, at sighiu sa linia politiga de su segretariu, ma dd’ia bolli pregontai aunia funt acabbadas is tesseras”.
Sighint is dus: “Custa est s’urtima bia chi cicaus de nosi cunfrontai”. Ma a dogna manera, assegurant, non ant passai a manca: “Seus ominis de Centrudrestra”.
Sa spusta de Moro e de Solinas non s’est fata aspetai po meda e in dd’unu paperi est lompia chena mesu fueddus: “Is scioberus de su cungressu natzionali de su partidu non tenint abbisongiu de essiri cumprendias e ancora de mancu de crarimentus: chini est sardista ddas sighit, chini invecias non ddas bolit sighiri podit fairi un’atru caminu”.
Màuru Mura
Mercuris, su binticuatru de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.sardegnaierioggidomani.com/economia/gianni-chessa-dopo-20-anni-finalmente-la-regione-riprende-con-gli-investimenti-nel-settore-del-commercio/
