Est morta Gina Lollobrigida, femina e atrici de su cinema famada in totu su mundu. Fut nascia in Subiaco, in is orus de Roma su 4 de triulas de su 1927 e duncas contaiat norantacinc’annus. De unu pagu de tempus s’agataiat in d’una clinica de Roma.
At trabagliau cun is registas italianus prus famaus de sa storia: Arbertu Lattuada, Vitoriu De Sica, Mariu Monicelli, Perdu Germi, Alisandru Blasetti e Mariu Soldati.
In sa carriera, longa meda, Gina Lollobrigida at bintu premius mda: unu Golden Globe, seti David de Donatello, dus Nastri d’argento. Unu de is film prus famaus chi at fatu est “Pane, amore e fantasia” de Dinu Risi.
Lollobrigida fut figlia de una familia errica, su babbu produsiat mobilis, chi in segus a sa guerra, funt diventaus poburus.
Is primus passus ddus fait candu fut piciochedda de dixiaset’annus in tiatra e a pustis cicat unu caminu in Cinecittà. Diventat famada a innatis in s’esteru e po annus meda fut, paris a Alida Valli, bofia beni de is americanus. Su primu de si nd’acatai de cantu fut brava est Howord Hughes, chi in su 1950 dda prenit de oru po trabagliai in America. Ma sa Lollobrigida non podiat abarrai po tempus meda in America e at torrau a fairi is valigias po ndi torrai in Italia. Po mori de custu Howord non dd’at fata prus trabagliai in is Stadus Unidus finas a su 1956. Ma Gina Lollobrigida cumentzat a ddu fairi in Roma e imbrassat su cinema italianu de su “neorealismo” e cun Carrulu Lizzani e Perdu Germi si pigat is primas partis de protagonista.
Su primu trabagliu chi dd’at fata diventai famada in totue est “Pane, amore e fantasia” de Luisu Comencini de su 1953 e cun custu regista at fatu finas sa “Fata Turchina” in is contus de Pinocchio.
A su cumentzu de is annus setanta at lassau su cinema po ponni sa passioni sua in atras professionis: intru de custas est de arregodai cussa de fotografa.
Màuru Mura
Martis, su 17 de gennargiu de su 2023
Foto: https://www.varesenews.it/2023/01/morta-gina-lollobrigida-addio-alla-grande-attrice-italiana/1538576/
