S’Italia de sa pallavolo de is feminas bincit sa medaglia de oru in is Olimpiadis de Parigi e aici is piciocas asulas, allenadas de Julio Velasco, imbucant, cun totu su spantu, in sa storia de su sport italianu. Non fut mai sussediu chi is feminas bincessint custa medaglia e miniscimentu mannu andat massimamenti a Velasco etotu, chi giai cun is mascus iat fatu cosas de meraviglia manna.
Sa medaglia fragat finas de sardu po mori ca una de is giogadoras prus bravas e connotas de totu sa scuadra est Alessia Orro, nascia in Aristanis, ma narboliesa in conca, coru e in is intragnas.
Sa matessi Alessia at umperau is social po amostai sa cuntentesa manna, ma ddu at fatu feti cun dus fueddus: “Campionas olimpicas”. A su costau una medaglia d oru e una facicedda cumovia. Ma eita depiat aciungiri sa campionessa? Non ddue funt atras fueddus: feti cuntentesa. Feti prus adduru umperat Instagram poa mostai, custa borta, s’imbrassu cun sa familia, cussu cun sa cumpangia Myriam Sylla e sa strinta de manu cun is americanas, bintas in su campu.
Torrendu a sa partida est a nai ca no at tentu perunu contu de averas. Difatis is asulas ant sciasciau is piciocas de is Stadus Unidus po tres partis a zeru. Est a nai puru, po fairi cumprendiri cantu custa medaglia est minescia, ca s’Italia at perdiu feti una parti de partida intru de dixiaseti, invecias, bintas. Numurus de spantu!
Sa medaglia de oru de sa pallavolo est sa de doxi po s’Italia in custas Olimpiadis pariginas e sa de coranta in totu, comenti giai fut sussediu in Tokio, aunia perou is orus funt erribaus a dexi.
Custas is piciocas chi ant portau in is pumus artus sa pallavolo italiana: Carlotta Cambi, Alessia Orro, Alice Degradi, Caterina Bosetti, Myriam Sylla, Gaia Giovannini, Marina Lubian, Anna Danesi, Sarah Fahr, Paola Egonu, Ekaterina Antropova, Monica De Gennaro, Ilaria Spirito.
Màuru Mura
Lunis su doxi de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ilfattoquotidiano.it/2024/08/11/olimpiadi-pallavolo-femminile-finale-stati-uniti-oro-egonu-orro-sylla-danesi-chi-e-storia/7655285/
