Oi, s’undixi de friargiu, is catolicus arremonant su amostamentu de unu de sa Imbiada Virgini de Lourdes. Fut, difatis, s’undixi de friargiu de su 1858 candu, in Lourdes, unu villagiu piticu chi s’agatat in sa parti bascia ocidentali de sa Francia, Bernardette Soubirous, una piciochedda de catodisci annus at “atobiau” sa Virigini Maria. Custa bia de unu at sinnau su cumentzu de una filera de amostamentus chi ant mudau su villagiu de Lourdes in dd’unu de is logus de pellegrinagiu de prus importu po su mundu de sa genti chi creit in Deus e Gesu Cristu.
Sa piciochedda francesa s’agataiat a ndi boddiri linna in is orus de sa ruta de Massabielle, candu una figura arva e lugenti s’est amostada. Sa matessi Bernardette iat fueddau de una “signora cun dd’unu bestiri biancu e una fascia asula e una colori de orrosa in is peis.
Custa, chi Bernardette at arreconnotu comenti de sa Madonna, dd’iat pediu de torrai in cussu logu atras ses bias. A su cumentzu, sa picioca, teniat calencuna duda, ma teniat su disigliu de ponni menti a cantu ddi pediat sa “signora”.
Is amostamentus funt sighius de s’undixi de friargiu finas a su 16 de mesi de orgiolas de su matessi 1858. In custus “atobius”, sa Madonna at donau a Bernardette prus de unu messagiu de preghiera e penitentzia, ma su scoviamentu de prus importu est stetiu de scorrovonai una mitza in sa ruta, aunia, dapoi, ndi bessiat un’abba cunsiderada “miracolosa”.
Finas chi a su cumentzu sa genti non ddue creiat meda, is amostamentus de Lourdes si funt fatus connosciri gratzias a is miraculus, in numuru mannu, chi totus ant donau a s’abba e, massimamenti, a sa fidi de is catolicus.
In su 1862, a pustis unu indagu longu, sa Cresia at arreconnotu is amostamentus e oi Lourdes est unu logu de spiritualidadi aunia lompint, in donnia, paricias personis po pediri calencuna gratzia de sa Madonna.
Màuru Mura
Martis, s’undixi de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=netFnwGiWqI
