Turmenta in pissu de su sottosegretariu a sa Saludi de su Guvernu Meloni, Marcellu Gemmato, po is fueddus chi at umperau po ponni in duda s’umperu de is vacinus contras de su Covid
“Po tempus meda de sa pesta s’Italia est stetia sa prima natzioni po mortus de Covid e sa de tres po impestu, duncas custus arresurtaus mannus, chi totu narant, deu non ddus biu”, at nau Gemmato, in sa trasmissioni de Rai “Restart-L’Italia ricomincia da te”. Candu su numuru de su Corriere della Sera Ardu Cazzullo dd’at fatu notai ca “chena vacinus iat essi andada peus puru”, su sottosgretariu at nau: “Custu ddu narat fusteti, non teneus sa prova chi possat nai s’imbessi. Ma deu non soi innoi a orruiri in sa trapa de essiri contras o a favori de su vacinu”.
Oberit cielu, is fueddus de Gemmato ant inderetura fatu chistionai totus: “Unu sottosegretariu a sa Saludi chi negat is vacinus non podit abarrai in carriga”, at tronau, intru de is atrus, su segretariu de su Partidu Democratigu Erricu Letta.
“Gemmato si ndi depit andai, unu sottosegretario a sa Saludi chi non pigat distantzias de is no-vax est in su postu sbagliau”, at decrarau invecias Carrulu Calenda, leader de Atzione.
Comenti sussedit sempiri, candu si sbagliant is fueddus, a pustis is reatzionis indignadas, est lompia sa retromarcia de Gemmato: “Su vacinu est una prenda contras de su Covid, is fueddus mius non boliant nai cussu e funt stetius piguas de una chistionada unu pagu prus longa. Si bolit sempiri strumentalizai totu”, at spiegau su sottosegretariu. Aciungendu: “Apus sempiri sustenniu sa validadi e sa capassidadi chi su vacinu tenit po protegiri de sa maladia, massimamenti cussus chi funt giai postus mali cun atras maladias”.
Ma poita invecias de torrai sempiri in segus a is fueddus naraus a innantis non si donat atentzioni manna? Non serbit meda!
Màuru Mura
Mercuris, su 16 de Sant’Andria de su 2022
Foto: https://www.ilfattoquotidiano.it/in-edicola/articoli/2022/11/15/i-dubbi-di-gemmato-sui-vaccini-gia-nel-luglio-2021/6874184/
