Funt lompendu in Sardigna is capus de is partidus natzionalis, ca mancant tres cidas po is regionalis sardas de su 25 de friargiu. Is trumas funt trabagliendu po preniri is atobius, ma s’agatant giai cussu segurus. Po Alissandra Todde, candidada de su “Campu mannu” ant a lompiri is dus capus de is partidus prus mannus chi dda sustenint, su Partidu Democratigu e is Steddaus. Sa segretaria de is democratigus, Elly Schlein, at a erribai cras in Salighera, a is ses de merì in su Cinema Miramare, po un’atobiu pubricu cun cussa chi podit diventai sa prima femina comenti de Governadori de Sardigna. A pustis una cida at a lompiri Giusepu Conte chi at essi su 15 in Tatari, sa dì a pustis in Nugoro e Aristanis e at a serrai su 17 in Casteddu. Ancora non si connoscit aunia at a fueddai.
Torrat, invecias, dapoi de duas cidas de sa bisita in Casteddu, dominigu su capu de sa Lega Mateu Salvini, po unu giru in su pissu de sa Sardigna po agiudai su candidau de su centrudrestra Paulu Truzzu: a is ses e mesu at essi in Salighera in su mercau de sa fruta e at abarrai finas su lunis. Ancora non si scit chi Giorgia Meloni at a lompiri po agiudai su sindigu casteddaiu.
Si connoscint, invecias, is particolaris de is bisitas de Carrulu Calenda, de Atzione, e Fideli Pizzarotti, presidenti de + Europa, chi sustenint Arrenatu Soru, s’atru candidau de su centrumanca. Cuatru is atobius de Calenda: su de unu est po cras, a is undixi de mengianu, in Tatari in s’albergu Gratzia Deledda, aunia s’ant agatai issu, Pizzarotti e su matessi Soru. S’atobiu de dus at essi in Nugoro in su pustis prangiu e dominigu is atrus dus atobius cun sa genti, in Igresias a is dexi de mengianu, po chistonai de su disisperu de is industrias in Sardigna, e a is ses in Casteddu po presentai su libburu in su T Hotel.
Pizzarotti cumentzat oi in Tatari, cras at a lompiri in Terranoa e dapoi at a bisitai Ogliastra e Sulcis po acabbai su giru in Casteddu.
Màuru Mura
Cenarba, su noi de friargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://roma.corriere.it/notizie/politica/23_ottobre_15/dopo-l-orticaria-l-elmetto-il-duello-conte-schlein-si-riaccende-sulla-guerra-0463d380-1c73-4a12-ae96-b0c545d78xlk.shtml
