Unu lunis a merì de ponni inderetura a un’ala, po torrai a partiri e pensai a sa partida cun su Lecce, dominigu a mesudì e mesu in sa Unipol Domus. “Lastima, boliaus fairi sonumancu unu puntu, ma candu agatas indenanti una scuadra chi giogat meglius de tui ddi depis feti nai bravus”, custus is primus fueddus de Claudiu Ranieri a pustis su 3-0 contras de su Genoa. “Ant minesciu, gioghendu beni meda: a issus est arrennesciu totu, a nosu nudda. Sa fortza nosta, in is urtimas partidas, fut cussa de sa barra e de abarrai unius, ma oi non ce dda eus fata”.
Is puntus chi serbint po si sarvai non mudat cunfroma a cussu chi, Ranieri, at giai nau in is cidas passadas: “Dificili a nai cantu puntus serbant, deu creu 36 o 37, ma non ddi soi seguru. Tocat a fairi puntus e abarrai scidus, poita non si scit mai: ancora si depint giogai partidas medas intru de is scuadras chi funt gherrendu po non ci calai, giai ndi teneus unu dominigu chi benit. Depeus fairi prus puntus chi podeus, est unu campionau bellu meda po cantu pertocat s’Europa e su calamentu in serie B. Seus stetius po otu mesis a suta de abba, ndi eus bogau sa conca e non ce dda depeus torrai a ponni a suta”.
Luvumbo scualificau, Viola chi s’est frimau sabudu passau, Dossena dominigu, Mina cun Jankto eris: po su Casteddu s’acostiamentu a sa partida cun su Genoa s’est prenu de una filera de giogadoris chi non podiant giogai. Ranieri, chi a s’acabbu de sa partida at cumandau a is giogadoris de andai a saludai is tifosus chi s’agataiant in Genova, non bolit nai ca sa partida s’est perdia feti poita Mina no at giogau: “Non feti issu, ma finas Dossena e atrus chi serbiant. Eus fatu cussu chi eus possiu: non meda, est a nai!”.
Immoi su Casteddu e Ranieri depint torrai a partiri. “Prus che trabbagliai in is concas de is giogadoris, depeus cicai de torrai a tenni cussu chi oi non ci funt. Sa spera est manna. De tempus seus nendu ca is partidas benientis funt de un’importu mannu, depeus sighiri a ddu nai. Su Lecce est indenanti a nosu e cuasi seguru de abarrai in serie A. Depeus cicai de binciri contras de una scuadra chi giogat beni”.
Màuru Mura
Martis, su trinta de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=zETbQ0b3BUE
