Est morta Angela Lansbury, “La signora in giallo”, teniat norantases annus. S’atrici ingresa est morta in domu sua in Los Angeles. In totu sa carriera sua at bintu cincu Tony Award po is spetaculus in Broadway e at tentu doixi “nomination” a is Emmy po su personagiu prus famau chi at recitau: Jessica Fletcher.

Angela Lansbury, s’atrici ingresa famada po is telefilm La signora in giallo, ma giai de piciochedda fut connota in Holliwood a innantis e in segus steda lughente in is musical de Broadway, est morta in Lo Angelese. Sa morti est stetia annuntziada de sa familia sua: “Is figlius de Angela Lansbury funt bintus de sa tristura poita sa mamma insoru est morta in su sonnu in sa domu sua de Los Angeles. Arregodant a totus ca tra cincu dis iat airi cumentzau su norantasetesimu annu de vida”, si ligit in comunicau de sa familia.

Sa prima puntada de su telefilm “La Signora in giallo, chi dd’at fata connosciri apetotu est de su 1984.

In sa carriera sua Angela at bintu cincu Tony Award po is prestatzionis in is palcoscenicus de New Uork, de Mame in su 1966 a Blithe Spirit in su 2009, candu teniat 83 annus, a testimonia fintzas de sa restistentzia manna chi teniat.

Nascia in Londra su 16 de Santu Gaine de su 1925, fut figlia de s’atrici irlandesa Moyna MacGill e de Edgar Lansbury, unu cumercianti de linna e politigu, figliu de unu de is capus de su Partidu Laburista, George Lansbury. A catodixi annus, in tempus de guerra, Angela Lansbury lasseit s’Inghilterra po andai in is Stadus Unidus.

Teniat feti dixiot’annus candu, a pustis su diploma in sa Feagin School of Dramatic Art de New York, at tentu sa prima ocasioni de fairi unu film: sa serbidora mala chi trumentat Ingrid Bergman in su “thriller” Angoscia dirigiu de George Cukor in su 1944. Una prima borta lestra chi dd’at portada firmai unu cuntratu cun sa Mgm e a una “nomination” po is Oscar comenti atrici megliu, ma nono protagonista. Una segunda nomination a is Oscar dd’at lompiri in su 1946 candu at trabbagliau in “Il ritratto di Dorian Gray” sighia de Albert Lewin. Unu cumentzu de carriera mannu, ma a pustis atrus trabbaglius medas in su mundu at tentu fama e gloria de su 1984 candu at bestiu is bestiris de Jessica Fletcher.

 

 

Màuru Mura

 

Mercuris, su 12 de Santu Aine de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

Foto: https://www.lanostratv.it/2022/10/morta-angela-lansbury-la-signora-in-giallo-lattrice-aveva-quasi-97-anni/