Unu sordau de s’Onu, de arreigini serba, est mortu custu mengianu po mori de is sparus in is orus de Marjayoun in su Libanu de basciu. “Atrus dus sordaus, finas cussus boddius e is sparus, funt in cura in sa strutura medica a intru de sa basi”. Ddu fait sciri s’Unifil, sa missioni Onu in su Libanu chi est sunfrendu sa guerra intru de Israele et Hezbollah, chi po cussu chi naraiant is bogis non depiant sighiri a gherrai. Invecias, a cantu parit, si sighit a sparai.
Su sordau de sa Serbia s’agataiat, prus o mancu, a setanta chilometrus de sa basi d Shama aunia s’agatat sa truma italiana de Unifil, cumandau de sa Brigata Sassari. Sa basi boddia de is sparus est cussa de sa parti Est de sa missioni Onu.
“A pustis is sparus, chi funt de su merì adduru de eris”, faint sciri de s’Uniful, “su sordau ddu eus portau in elicoteru in su spidali de Beirut, aunia po est mortu po mori de is lantiadas gravis. Boleus donai is passientzias prus mannas a sa familia, a is amigus e a is cumpangius de su sordau chi at perdiu sa vida cumbatendu po sa pagi”.
S’Unifil at cumentzau unu indagu po biri comenti est andada de averas. In su fratempus is responsabilis ant “amostau unu numuru sempiri prus artu de sparus in su Libanu meridionali. Sa violentzia depit acabbai. Cumbidaus, in prus, is autoridadis natzionalis a fairi partiri un’indagu po cantu est susssediu, acapiai chini tenit curpa e garantiri sa responsabilidadi penali”
“A nomini de is Fortzas Armadaas Italianas, disigliu donai is passientzias po cantu sussediu cun sa morti d su sordau de sa Serbia”, at scritu su capu de Stadu Magiori de sa Difesa, Lucianu Portolano. In custas oras de dolu mannu, at aciuntu Portolano, “su pensamentu nostu est po sa familia de su sordau mortu e finas po is Fortzas Armadas Serbe, a is calis andat sa solidariedadi nosta. S’Italia est a su costau de totu sa genti Unifil chi sighit a trabbagliai cun coragiu e professionalidadi po cicai sa pagi”.
Foto: https://www.losservatorio.org/it/civili-in-conflitto/rassegna-web/item/2050-peacekeeper-dell-onu-ucciso-e-due-feriti-nella-repubblica-centrafricana
