A pustis cuasi un’annu de cussu gol, a s’urtimu segundu, de Pavoletti in Bari chi iat arregalau sa Serie A a su Casteddu, eris est lompia un’atra dì de festa manna. E su protagonista est sempiri Caludiu Ranieri, chena peruna duda. Un’atra borta s’alelnadori romanu at fatu unu meraculu in Emilia, a pustis chi trintatres annus a immoi si fut sarvau cun su Bologna e Ranieri non si nd’est scaresciu po nudda: “S’atra borta fut su matessi 19 de maju e iau bintu po 1-2 in Bologna”.

Sa pregunta po issu est sempiri sa matessi: abarrat o no abarrat finas ocannu chi benit? Ranieri, chi est omini sabiu, arrespundit: “Tengiu un’atru annu. Immoi lassaimì trancuillu, ca funt giai tres mesis chi mi ddu pregontais”. E, in segus, aciungit: “Casteddu est domu mia. Immoi nosi gosaus sa sarvesa, apu sempiri nau de su cumentzu ca depiaus cherrai finas a s’acabbu e soi cuntentu meda de podiri festai in sa partida benienti indenanti de is tifosus nostrus. A innanti de giogai oi apu nau a is piciocus ca ocannu passau in Bari m’iat lamau Gigi Riva narendumì ca totu sa Sardigna fut in is palas nostras: oi apu torrau a ripitiri cussus fueddus”.

Est de arregodai ca Ranieri in su mesi de friargiu, a pustis airi perdiu cun sa Latzio in s’Unipol Domus, si fut dimitiu, ma is giogadoris no iant bofiu: “Creu chi su fogu si siat allutu tantu. Ia nau a is piciocus ca teniant abbisongiu de unu eletroshock, poita trabbagliaiant beni ma in partida non funt aici cunvintus: po custu ia nau ca mi nd’essi andau, poita giai funt cunvintus de si sarvai, ma non ddu bia cunvintus de averas. Issus invecias ant bofiu sighiri totu paris e ant donau de averas totu. In sa carriera mia apu sighiu sempiri su coru”.

Immoi sa bocia passat a su presidenti Giulini chi depit aprontai una scuadra chi ocannu chi benit non facat sunfriri totu is tifosus comenti de ocannu. Sa spera est manna!

 

 

Màuru Mura

 

 

 

Lunis, su binti de maju de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.sportmediaset.mediaset.it/calcio/cagliari/ranieri-festeggia-la-salvezza-cagliari-e-casa-mia-godiamoci-la-festa_82444690-202402k.shtml